Араас суортаах сибэккилэринэн, ньуолар-солко отунан симэммит көнө, унаар хочолордоох, айылҕа анаан айбыт алаастардаах Аммаҕа кэлиҥҥи сылларга ыҥырыаны иитиинэн, мүөтү оҥоруунан дьоһуннаахтык ылсан дьарыктанар дьон элбээн иһэллэр. Онно бу барыстаах уонна кэскиллээх дьыаланан ылсан үлэлиир Амма энтузиастара үтүө холобурунан буолаллар.
Ол курдук, практика уонна теория бииргэ холбоммут тэрээһинин Дьокуускайдааҕы тыа хаһаайыстыбатын техникумун эбии үөрэхтээһиҥҥэ педагога Марфа Дмитриева салайан ыытта. Кинини кытта биллиилээх урбаанньыт, Амма улууһугар хаһыс да сылын тигээйи иитээччилэрин үөрэтээччи, Амма улууһугар куратор Марат Залялов кыттыыны ылла уонна үлэтин уопутун кэпсээтэ, сүбэлэри биэрдэ.
Оттон олохтоох ыҥырыа иитээччилэрин салайааччыта Эльвира Пестерева билигин бу салааҕа туох хамсааһын, саҥа сүүрээннэр туһунан бэртээхэй иһитиннэриини оҥордо. Уопуттаах киһи буоларынан кини Амма усулуобуйатыгар тигээйини иитии курдук курдук олус ымпыктаах-чымпыктаах дьарыкка хайдах гынан ыҥырыалары кыстатары, таһырдьа таһаарары, сайын мүөтү оҥорууну көрдөрдө, кэпсээтэ. Кини ордук мүөтү хайдах гынан харайары, батарары, атыылыыры билиһиннэрбитин сэҥээрдилэр.
Ыҥырыаны иитиигэ интэриэстээх дьон бу тэрээһиҥҥэ кинигэ, хаһыат ыстатыйаларын, сарсыҥҥылаах салааҕа туттуллар маллар, инструменнар быыстапкаларын сэҥээрдилэр.
Бу көрсүһүүгэ Бөтүҥ нэһилиэгин баһылыга Саргылаана Борисова, Амма улууһун тыа хаһаайыстыбатын управлениетын кылаабынай зоотехнига А. А. Фомин кытыннылар, инники үлэ былаанын торумнастылар.
Елизавета СИДОРОВА, Амматааҕы киин бибилэтиэкэ ааҕааччыны кытары үлэлиир салаа сэбиэдиссэйэ.
Хаартыскалар ааптар тиксэриитинэн
-
0
-
0
-
0
-
0
-
0
-
0
