Уопсастыба

Бу ыарахан кэммитигэр нэһилиэкпит олохтоохторо, улуус тэриллиилээх хаһаайыстыбалара, өрөспүүбүлүкэбит араас муннуктарыттан, улууспутуттан биирдиилээн урбаанньыттар көмөлөһөргө бэлэмнэрин биллэрэн хаһаайыстыбаны чөлүгэр түһэрэргэ үлэ саҕаламмыта. Аан бастакынан эрэли үөскэтэр сүрүн төһүү күүһүнэн нэһилиэкпит олохтоохторо, өрөспүүбүлүкэ араас муннуктарыттан биир дойдулаахтарбыт чуолаан, оскуолабытын 1977 с бүтэрбит выпускниктар социальнай ситиминэн бу хаһаайыстыбабыт чөлүгэр түһэригэр көмө аахсыйаҕа кыттыҥ диэн ыҥырыы таһаарбыттара. Барыта 203 тыһ солк суумалаах харчы көмө оҥоһуллубута. Ону таһынан Урбаан пуондатын тэрилтэтэ кыра бырыһыаннаах сойуом биэрбитэ. Саҥа хотону туттарга "Үнүгэс" СХПК-ны кытта дуогабар түһэрсэн кылгас кэмҥэ ирдэниллэр докумуоннары оҥоро охсон, пуонда салайааччыта Петр Федорович Максимов Үгүлээккэ эппиэттээх үлэһиттэрин кытта бэйэтинэн кэлэн миэстэтигэр үлэлээбиттэрэ. Түмүгэр 330000 тыһ. солк сойуом биэрэн, саҥа хотон матырыйаалын ылбыппыт. Олохтоох бүддьүөттэн 1 мөл. солк , Бүлүү куораттан СХПК "Сыа Бүлүү", биир урбаанньыт уонна биирдиилээн дьон көмөлөһөннөр бу тутуу түмүктэннэ.

Таһаҕас тиэллиитигэр "Сахатранснефтегаз" тэрилтэтэ генеральнай дириэктэрэ, Ил Түмэн дьокутаата А.З.Колодезников, кылаабынай инсэниэр, бүлүүлэр уолбут, Ил Түмэн дьокутаата А.В. Гоголев, Кысыл Сырдааҕы гаас управлениетын начаалынньыга В.П. Ильченко, СМУ начаалынньыга В.В. Андрющенко тиэхиньикэнэн көмөлөһөннөр кылгас бириэмэ иһигэр хотон матырыйаалын нэһилиэккэ кыл-мүччү суол быстыан иннигэр тиэрдиллибитэ.
Онон алтынньы 17 күнүгэр Үгүлээккэ бука бары дьоммут көмөлөһөн, "норуот күүһэ -- көмүөл күүһэ" диэбиттэрин курдук саҥа арболит хотон тутуллан үлэҕэ киирдэ.

Уруккута Үүнэкээн диэн пиэрмэ олоҕор, сопхуос саҕана 7 хотон, тыһыынчаҕа тиийэр хороҕор муостаах турбута. Үп-харчы кырыымчык буолан аныгылыы сэндвич панель буолбакка, урукку ньыманан арболитынан туттубут. Бу толкуйу СХПК "Үнүгэс" бэрэссэдээтэлэ Анатолий Терешкин миэхэ эппитэ. Төһө да күчүмэҕэйдээҕин иһин барытын иккиэн суоттаан хас да күн ырытан баран, атын вариант суоҕун өйдөөммүт инникибит диэки түһүнэн кэбиспиппит. Анатолий туох баар матырыйаалы көрөн сакаастаан, Дьокуускай куораттан ылбыппыт. Олохтоох уолаттарбыт 1 ыйтан ордук курдук үлэлээн тутан кэбистилэр. Технологията ыарахан соҕус этэ эрээри, уолаттар онтон толлубакка, сахалыы толкуйунан мындырдаан туттулар. Бу саҥа хотон киириитэ инники өттүгэр тыа хаһаайыстыбата нэһилиэккэ сайдарыгар улахан төһүү күүһүнэн буолуоҕа.Үгүлээппит үлэһит дьоно инникигэ эрэллээхтэр, нэһилиэк сайдарын туһугар түмсүүлээхтэр. Саҥа хотон үлэҕэ киирэригэр көмөлөспүт бар дьоммутугар нэһилиэк олохтоохторун аатыттан барҕа махталбын биллэрэбин. Саҥа хотон боруогун 75 хороҕор муостаах атыллаата, кыстыгы этэҥҥэ туоруохтара.

Октябрь Лукин, Үгүлээт нэһилиэгин баһылыга. Хаартыскаларга Надежда Спиридонова түһэриилэрэ.