Сүрүн иһитиннэриини СӨ физичэскэй култуураҕа уонна успуортка миниистирин бастакы солбуйааччы Гаврил Мохначевскай. Адаптивнай физичэскэй култуура - доруобуйаларынан хааччахтаах дьону чөлүгэр түһэрэргэ уонна кинилэр социальнай эйгэҕэ сөп түбэһэн сылдьалларыгар анаан успуордунан дьарыктааһын уонна чэбдигирдии буолар. Маныаха кинилэр толору олоҕу олорорго өй-санаа өттүнэн бэлэмнээх уонна хас биирдиилэрэ уопсастыбаҕа туһалаах буоларга сананалларыгар өйөөһүн, көмөнү оҥоруу киирэр.
Адаптивнай успуортка болҕомто кэлиҥҥи сылларга улам улаатан иһэр. Ол курдук 2015 сылга успуорт министиэристибэтин иһинэн «Өрөспүүбүлүкэтээҕи Адаптивнай физичэскэй култуура уонна успуорт киинэ» СӨ САТ тэриллэн, доруобуйа харыстабылын министэриэристибэтин иһинэн үлэлиир «Өрөспүүбүлүкэтээҕи Эмтиир физкултуура уонна успуорт мэдиссиинэтин киинэ» СӨ САТ икки ардыларыгар ити сыл Сөбүлэҥ түһэрсиллэн доруобуйаларынан хааччахтаах уонна инбэлиит дьону адаптивнай физичэскэй култууранан уонна успуордунан дьарыктааһын саҥа таһымҥа тахсыбыта. Ол кэмтэн ыла бу икки тэрилтэ Дьокуускайга «Самородок» бассейн баазатыгар киинэнэн үлэлииллэр.
Ону тэҥэ тэрээһиҥҥэ СӨ доруобуйа харыстабылын миниистирин солбуйааччы Любовь Бурнашева, Бүтүн Арассыыйатааҕы инбэлииттэр уопсастыбаларын Саха сиринээҕи салаатын салайааччыта Ирина Лебедева, Бүтүн Арассыыйатааҕы инбэлиит оҕолор төрөппүттэрин уопсастыбаларын Саха сиринээҕи салаатын салайааччыта Алеся Кондратьева үлэлэрин хайысхатынан блаһанньаны билиһиннэрдилэр, кыһалҕаларын эттилэр, рекомендацияларын биэрдилэр.
Төгүрүк остуолга кэпсэтии чааһыгар норуот дьокутааттара Елена Голомарева, Владимир Прокопьев, Гаврил Парахин, Вячеслав Куличкин уонна Алена Атласова, Василий Егоров, СӨ профсойуустарын бэрэссэдээтэлэ Николай Дегтярев кыттан этиилэри киллэрдилэр.
Сүрүннээн төгүрүк остуолга адаптивнай доруобуйаларынан хааччахтаах дьону, ол иһигэр Анал байыаннай дьайыы кыттыылаахтарын уонна оҕолору адаптивнай успуордунан дьарыктааһыҥҥа анал бааза, дьарыктыыр тэрил аҕыйаҕа, анал үөрэхтээх тириэньэрдэр, инструктордар тиийбэттэрэ, күрэхтэһиилэргэ кыттыыга айан ороскуотун толуйуу, үбүлээһин аччааһына уо.д.а кырдьыга да билиҥҥи олохпутугар көрсөр үгүс кыһалҕаларбытын эттилэр. Анал байыаннай дьайыы кыттыылаахтарын чөлүгэр түһэриигэ болҕомтону уурарга биир бастакынан ааттанна. Төгүрүк остуолга Саха Сириттэн аан дойдутааҕы таһымнаах күрэхтэһиилэргэ, паралимпийскай уонна сурдолимпийскай ооньууларга кыттыы туһунан кэпсэтии улахан интэриэһи ылла. Ол курдук, билиҥҥи туругунан Саха Сириттэн 8 киһи аан дойдутааҕы күрэхтэһиилэргэ ситиһиилээхтик кытта сылдьалларын, ону тэҥэ бэйэлэрин көрүҥнэригэр билиҥҥитэ Паралимпийскай оонньуулар таһымнаах көрдөрүүлээхтэрин бэлиэтээтилэр. Онон үчүгэй былааннаах, сатабыллаах дьарыгы аастахтарына, улахан күрэхтэһиилэргэ кыттан истэхтэринэ, аны 2 сылынан Лос-Анджелеска ыытыллыахтаах Паралмпийскай оонньууларга путевка ылыахтарын сөбүн иһитиннэрдилэр.
Түмүккэ Георгий Балакшин кыттыбыт дьоҥҥо махтанан туран, киирбит этиилэри, рекомендациялары тэрээһин резолюциятыгар киллэрэн Ил Түмэн сис кэмитиэтигэр, салгыы бүддьүөтү тыырыы хамыыһыйатыгар көрүүгэ киирэрин, онуоха дьокутааттар өйөбүллэригэр эрэнэрин биллэрдэ.
Төгүрүк остуол туһунан сиһилии «Ил Түмэн» хаһыат кэлэр нүөмэриттэн билсиэххитин сөп.
Алексей МАТВЕЕВ
Хаартыскалар Василий Кононов түһэриитэ
-
1
-
0
-
0
-
0
-
0
-
0
