Спикер Петр Гоголев эҕэрдэ тылыгар Саха сиригэр бастакы юристар көлүөнэлэрэ баар буолалларыгар, Москва, Санкт-Петербург, Казань, Томскай куораттарын императорскай университеттарын үөрэнэн бүтэрбит биир дойдулаахтарбыт Михаил Алексеевич Афанасьев, Дамиан Афанасьевич Кочнев, Гавриил Васильевич Ксенофонтова, уо.да. а. улахан өҥөлөөхтөрүн туһунан эттэ. «Кинилэр бастыҥ университеттарга үөрэнэн юрист идэтин баһылаан баран, норуоттарын ыарахан олохторун туораттан көрөөччү быһыытынан сылдьыбатахтара чуолкай. Кинилэр профессиональнай үлэлэрэ, толкуйдара, идиэйэлэрэ барыта төрөөбүт дойдуларын нэһилиэнньэтин олохторо-дьаһахтара тупсарын туһугар туһаайыллыбыта», - диэн Петр Гоголев тоһоҕолоон бэлиэтээтэ.
Петр Васильевич Михаил Федоров биир үөлээннээхтэрин ыҥырыыларын, баҕа санааларын тутуспутун, кинилэр тезистэрин, этиилэрин дакаастаабытын уонна Саха сиригэр юридическай үөрэхтээһини сайыннарыыны уонна наука киинэ аһылларын, итини тэҥэ, СГУ салалтатын быһаччы көмөтүнэн устудьуоннары кэтэхтэн үөрэтэллэрин уонна РСФСР Үрдүк үөрэҕин министиэристибэтин сөбүлэҥин ылан, 50 устудьуону үөрэтэр кыахтаах юридическай отделение аһылларын ситиспитин кэпсээтэ. Санатар буоллахха, Ил Түмэн Бэрэссэдээтэлэ 14 сыл ХИФУ юридическай факультетын салайбыта уонна Михаил Федоров үөрэнээччитэ буолар. Михаил Михайлович Петр Васильевич науканан дьарыктанарыгар сөптөөх быһаарыныыны ыларыгар сабыдыаллаабыт, сүбэ-ама биэрбит уонна бүтэһик кууруска научнай үлэтин салайбыт. «Биһиги 2001 сыллаахха М.В.Ломоносов аатынан Москватааҕы судаарыстыбаннай университекка кандидатскай диссертациябын көмүскээбит тиэмэбэр сүрүн төрүтүнэн, ологунан буолбут дипломнай үлэбин бииргэ бэлэмнээбиппит», -- диэн спикер Михаил Михайловичтыын бииргэ үлэлээбит үтүө кэмнэрин санаан ылла.
«Кини аан дойдуну фашизмтан көмүскээбит, араҥаччылаабыт буойун-саллаат буолар. Итини тэҥэ, кини саха драматургиятын төрүттээбит Анемподист Софронов – Алампа чиэһинэй аатын ситиһиигэ уонна история кырдьыгын арыйыыга улахан өҥөлөөҕүн уонна Анемподист Иванович Холуобунай дьыалатын үчүгэйдик үөрэтэн, судаарыстыбаннай оһуобай бэлитиичэскэй управление дьаһалын көтүрэргэ сөптөөх итэҕэтиилээх аргуменнары аҕалан ситиспитэ" - диэн парламент салайааччыта тоһоҕолоон бэлиэтээтэ.
Бу бэлиэ, ураты тэрээһиҥҥэ спикер Петр Гоголев «Хотугу форум» аан дойдутааҕы тэрилтэ толорооччу дириэктэрин солбуйааччытын эбээһинэһин толорооччу, Михаил Федоров сиэнэ Марьяна Максимоваҕа СӨ Судаарыстыбаннай Мунньаҕын Бэрэссэдээтэлин Махтал суругун үөрүүлээх быһыыга-майгыга туттарда.
«Ийэм Ольга Михайловна эһэм улахан кыыһа. Эһэм Владимир, Михаил диэн уолаттардаах уонна алта сиэннээх. Мин саамай кыра сиэнэ буолабын. Юриспруденция биһиги дьиэ кэргэн үтүө үгэстэрин кытта ыска ситимнээх. Аан дойдутааҕы научнай-практическай кэмпириэнсийэ Михаил Михайлович төрөөбүтэ 100 сылыгар ананан тэриллибититтэн биһиги дьиэ кэргэн киэн туттабыт уонна тэрийээччилэргэ махталбытын тиэрдэбит. Эһэм Арассыыйа хотугу уонна илиҥҥи норуоттарын правовой боппуруостарынан утумнаахтык дьарыктаммыта», - диэн ХИФУ доцена уонна АХШ институтун уонна Канадатааҕы РАН ыстаарсай научнай үлэһитэ Марьяна Максимова кэпсээтэ. Кэмпириэнсийэ аһыллыытыгар СӨ Конституционнай суутун бэрэссэдээтэлэ Александр Ким-Кимэн, ХИФУ юридическай факультетын декана Рум Ушницкай уонна Москватааҕы гуманитарнай университет юридическай факультетын декана Ольга Максимова (Михаил Федоров сиэнэ) кыттыыны ыллылар.
Санатар буоллахха, сэтинньи 17-21 күннэригэр ХИФУ юридическай факультетыгар «Право в контексте устойчивого развития Арктики: вызовы времени и новые возможности» диэн аан дойдутааҕы кэмпириэнсийэ онлайн эрэсииминэн ыытылла турар. 8 дойдуттан эспиэртэр кытыннылар. Кэмпириэнсийэ чэрчитинэн, ити тиэмэҕэ маастар-кылаастар, «төгүрүк остуоллар», научнай-практическай сэминээрдэр ыытылыннылар. 5 былаһааккаҕа 17 тэрээһин буолла.
-
0
-
0
-
0
-
0
-
0
-
0
