Дьиэ-уот боппуруоһугар кыһалҕалаах дьон көрсүһүүгэ кытыннылар, дьокутаакка санааларын этиннилэр. Олохтоохтору ордук хаарбах туруктаах дьиэ боппуруоһа долгутар эбит. Ол курдук, куорат олохтоохторо – П. уонна К. (кыһалҕалаах дьон аатын-суолун кэккэ биричиинэнэн суруйбатыбыт) – хаарбах туруктаах дьиэлэрин туһунан сиһилии ыйыталастылар. Кинилэр этиилэрин дьокутаат Дмитрий Семенов Дьокуускай куорат дьаһалтатыгар салгыы туруорсарга эттэ.
“Новый дом” тутар хампаанньаҕа албыннаммыт пайщик А. көрсүһүүгэ кытынна. Эмиэ тутар хампаанньаҕа албыннаппыт К. “Квадрат” СОНТ-ҕа сир учаастагын анатыы туһунан ыйытыыны биэрдэ.
Нерюнгри куораттан уопсастыбаннай диэйэтэл Р. Дьокуускай куоракка Саха сирин устуоруйатын түмэлигэр экспозицияҕа миэстэ көрүллүөн сөбүн туһунан туоһуласта. Түмэл салайааччыта туруорсуутун докумуонунан бигэргэтэн аҕаллаҕына, Култуура уонна духуобунай сайдыы министиэристибэтигэр салгыы туруорсуохпут диэн быһаардылар.
Ил Түмэн дьокутаата Дмитрий Семеновы кытта көрсүһүүгэ кэлбит дьон сайабылыанньаларын барыларын киэнин үлэҕэ ыллылар. Итини сэргэ дьокутаат тылынан сүбэни-аманы (консультацияны) биэрдэ. “Официальнай суруктары тустаах былаас уорганнарыгар тиэрдиэхпит. Салгыы туруорсуохпут”, – диэн эрэннэрдэ.
-
0
-
0
-
0
-
0
-
0
-
0
