Уопсастыба

---Саха Сирин олохтоохторо быйыл Ийэ сылын ыытар идиэйэбитин өйөөбүттэриттэн, сэҥээрэ ылыммыттарыттан олус үөрдүм. Ол туһунан миэхэ суруйаллар, көрсүһүүлэргэ этэллэр.

Биһиги норуоппут ураты култуурата, олоҕурбут духуобунай сиэрэ-майгыта барыта ийэҕэ тапталынан уонна дьиэ кэргэн сыаннастарын өрө тутуунан арыалланар.

Аан дойду саамай тымныы килиимэттээх сиригэр олорор буоламмыт, ийэ сылаас илиитин биһиги ордук сыаналыыбыт. Сыаналыыбыт -- ийэлэрбит дьиэҕэ түстүүр сылаас истиҥ эйгэлэрин.   
Аныгы дьахталлар, ийэлэр сайдалларыгар, карьераларын оҥостоллоругар усулуобуйа тэрийиэхтээхпит. Кинилэр уйгуларын уһансалларыгар мэһэйдиир, адаҕалыыр кыһалҕаларын түргэнник уонна көдьүүстээхтик быһаарар сүрүн сорукпут буолар. Ол иһин Ийэ сылынан мин СӨ Бырабыыталыстыбатыгар уонна муниципальнай тэриллии дьаһалталарыгар элбэх оҕолоох уонна оҕо иитэр дьиэ кэргэттэр, ийэ доруобуйатын харыстааһын, дьахталлар үлэнэн хааччыллыыларын боппуруостарын көрөллөрүгэр, быһааралларыгар сорудахтаабытым.

 Бу үбүлүөйдээх сыл “Үйэ оҕолоро” диэн тус сыаллаах ийэ хапытаалын олохтоотубут. Тохсунньу 1 күнүттэн номнуо 700-тэн тахса оҕо күн сирин көрдө. Олор бары сэртипикээттэрин туттулар.

Итинник өйөбүл миэрэлэр көмөлөрүнэн элбэх ийэ судаарыстыба өттүттэн болҕомто ууралларын билиэҕэ, ол кинилэри дьоллуоҕар эрэнэбин.

Саха Сирин дьахталлара үлэлэригэр -- баҕар, наукаҕа буоллун, айар эйгэҕэ буоллун, биисинэскэ буоллун – бары идэҕэ бэйэлэрин кыахтарын арыйалларыгар, өссө сайдалларыгар Ийэ сыла төһүү буолуоҕа.

Быйыл өрөспүүбүлүкэбит 100 сылын туоларын тоһоҕолоон бэлиэтиэхпин баҕарабын. Тоҕо диэтэххэ, судаарыстыбаннас олохтонуута оччотооҕу  дьахтар олоҕун тосту уларыппыта. Бүгүн кинилэр биһиги уопсастыбабыт үөрэхтээх, ситиһиилээх, айар-тутар талааннаах сорҕото буолаллар. Гражданскай уопсастыбабыт бу көхтөөх араҥата быйыл Ийэ сылыгар аһымал уонна волонтердар хамсааһыннарыгар кыттыахтара диэн эрэнэбин.

Билигин бары улахан тургутууну ааһа сылдьабыт. Икки сыл буолла биһиги сыстыганнаах дьаҥтан нэһилиэнньэни харыстыырга үлэлэспиппит уонна, хомойуох иһин, билигин да бу ыарыыны кыайа иликпит. Ол эрээри сотору кэминэн хоруона хамсыгын хаптатыахпыт.

Бу тургутууга, саамай сүрүнэ, киһилии сиэрбитин сүтэримиэх, дьоҥҥо үтүө сыһыаммытын күүһүрдүөххэйиҥ. Онуоха ийэ сүрэҕин истиэххэйиҥ, кини дууһатын сылааһыгар угуттаныаххайыҥ.

Маннык уустук кэмнэргэ биһиги ийэлэрбит, дьахталларбыт улахан айманыыта, айдаана суох аа-дьуо сылдьан, тустаах үлэлэрин оҥоро-толоро, үөрэнэ-үлэлии, биһиги туспутугар кыһалла сылдьалларыгар махтанабын.

Күндү ийэлэргэ баҕарабын кытаанах доруобуйаны, дьолу-соргуну! Бар дьоҥҥутун араҥаччылыы, арчылыы, уйгулаах олоҕу айа-тута сылдьыҥ!