Билиҥҥитэ доруобуйа харыстабылын эйгэтигэр икки улахан эбийиэк тутулла турар. Ол курдук, Дьокуускай куоракка 210 миэстэлээх өрөспүүбүлүкэтээҕи онкологическай диспансер уонна өрөспүүбүлүкэтээҕи кардиологическай диспансер тутуллан үлэҕэ киириэхтээхтэр. Маны таһынан, үһүс баараҕай эбийиэк – 245 миэстэлээх өрөспүүбүлүкэтээҕи клиническай инфекционнай киин тутуута саҕаланыахтаах.
Эрдэтээҕи былаанынан онкологическай диспансер 2023 сылга үлэҕэ киириэхтээҕэ. Ону өрөспүүбүлүкэ салалтата 2022 сылга түмүктүүр былааннаах. 8 этээстээх өрөспүүбүлүкэтээҕи кардиологическай диспансер тутуута 2021 сыл ахсынньы ыйыгар силигин ситиэхтээх.
245 миэстэлээх өрөспүүбүлүкэтээҕи клиническай инфекционнай киин Петр Алексеев уулуссатыгар тутуллара былааннанар. Билигин сирин учаастага быһаарылла сылдьар. Ил Дархан бырабыыталыстыбаҕа сир боппуруоһун ахсынньы бүтүөр диэри быһааралларыгар сорудахтаата.
Доруобуйа харыстабылын бастакы звенотун саҥардыы бырагырааматынан улуустарга хас да эбийиэк тутуллуохтаах. Ол курдук, 2021-2023 сылларга Бүлүү куоракка 73 миэстэлээх балыыһа, Муома улууһун Хонуу сэлиэнньэтигэр 22 сытар миэстэлээх поликлиника, Таатта улууһун Ытык Күөлүгэр 20 сытар миэстэлээх поликлиника, Уус Маайа улууһун Уус Маайа бөһүөлэгэр уонна Чурапчы улууһун Чурапчы сэлиэнньэтигэр 45 сытар миэстэлээх поликлиникалар тутуулара былааннанар.
Маны таһынан, мунньах кэмигэр 2021 сылга 33 эбийиэк хапытаалынай өрөмүөнүн боппуруоһа көрүлүннэ.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
-
0
-
0
-
0
-
0
-
0
-
0
