Ханты-Мансийскай автономнай уокурук былаастара түөрт нэһилиэнньэлээх пууннарга коронавирус утары быһыы ылбатах нэһилиэнньэҕэ булгуччулаах дьиэҕэ олоруу эрэсиими тутуһалларын туһунан хааччахтары олохтоотулар. Бу туһунан эрэгийиэннээҕи суһал ыстаап уурааҕынан ыйыллар. Хааччахтар сэтинньи 22 күнүттэн ахсынньы 5 күнүгэр диэри быһыы ылбатах уонна ыарыыга ылларбатах Нефтюганскай, Нягани, Урая уонна Кондинскай оройуон нэһилиэктэрин дьонугар-сэргэтигэр (Леуши сэлиэнньэ, Луговой, Междуреченскай, Мортка и Мулымья бөһүөлэктэрэ) туһаайыллар.
Ону тэҥэ бу нэһилиэнньэлээх пууннарга уопсастыбаннай ас-үөл тэрилтэлэрэ уонна фитнес-кулууптар үлэлиир чаастара 06:00-23:00 ч. диэри хааччахтанар, оттон култуурунай-маассабай, физкультурнай, успуорт тэрээһиннэрэ, үөрэх, эбии үөрэхтээһин тэрилтэлэр үлэлэрэ тохтотулунна. Дьиэттэн тахсыахха сөп: бородуукта маҕаһыыныгар, аптекаҕа, аҕам саастаах аймахтарга көмөлөһөргө, социальнай дистанцияны тутуһан пааркаҕа уонна сквердарга хаама тахсарга, ыты күүлэйдэтэргэ уонна бөх-сыыс таһаарарга.
Нэһилиэнньэлээх пууннарга уокурук үрдүнэн ыарыыга сутуллубут дьон ахсаана орто көрдөрүүнү куоһарарын туһунан Роспотребнадзор эрэгийиэннээҕи управлениетын начаалынньыга Инна Кудрявцева иһитиннэрдэ. Итинник дьаһаллар быһыыны ылбатах эбэтэр ыарыыга ылларбатах дьон доруобуйатын көмүскүүргэ туһуланарын быһаарда. Маны таһынан, бу хааччахтар коронавирус ыарыы тарҕаныытын туругун тосту уларытыахтаах. Эрэгийиэннээҕи суһал ыстаап дааннайынан, сэтинньи 23 күнүнээҕи туругунан, Юграҕа 88,03 тыһ. киһи ыалдьыбыт, 80,6 тыһ. - үтүөрбүт, 1627 - өлбүт.
-
0
-
0
-
0
-
0
-
0
-
0
