Биһиги өрөспүүбүлүкэбит дьиэ кэргэн сыаннастарын, чөл олохтоох буолууну тарҕатыыга, дьиэ кэргэн институттарын, оҕо аймах, ийэ, аҕа буолууну өйүүргэ өрүү инники күөҥҥэ сылдьар. Биһиги саҕалааһыннарбыт судаарыстыбаннай таһымҥа өйөбүлү ыллаллара махталлаах дьыала.
Саха сиригэр Ийэ күнэ алтынньы үһүс өрөбүлүгэр бэлиэтэнэр буолбута үтүө үгэскэ кубулуйда. Бу бэлиэ күн 1993 сыллаахха Саха сирин маҥнайгы Бэрэсидьиэнэ Михаил Николаев Ыйааҕынан баар буолбута. Арассыыйа Федерациятын үрдүнэн Ийэ күнүн 1998 сылтан сэтинньи бүтэһик өрөбүлүгэр бэлиэтиибит.
Дьиэ кэргэн, чугас дьоммут бигэ тирэхтээх, үтүө туруктаах буолуулара ийэлэрбититтэн улахан тутулуктаах. Биһиги олохпут сайдарын, олохпут чөл туруктаах буоларын туһугар кыһамньыгыт, хас биирдиибитигэр ураты болҕомтоҕут, үтүө санааҕыт иһин ис сүрэхпититтэн махтанабыт.
СӨ Судаарыстыбаннай Мунньаҕа (Ил Түмэн) ийэ буолуу, оҕо аймах дьыалаларыгар болҕомтону өрүү уурар. Алтыс ыҥырыылаах мунньах дьокутааттара элбэх оҕолоох дьиэ кэргэҥҥэ уонна «Ыал» өрөспүүбүлүкэтээҕи ийэ хапытаалыгар сыһыаннаах сүрүн сокуоннар ылыллалларыгар сөптөөх үлэни ыытта. Инники өттүгэр парламент ситэриилээх былааһы кытта дьиэ кэргэн институттарын өйүүргэ сөптөөх кэккэ миэрэлэр ылыллалларыгар таһаарыылаахтык үлэлиэҕэ.
Түгэнинэн туһанан, бу ураты бэлиэ күнүнэн Саха сирин ытык-мааны ийэлэрин барыгытын ис сүрэхпиттэн итиитик-истиҥник эҕэрдэлиибин! Бу орто дойдуга баар бары үчүгэйи, кэрэни, үтүөнү баҕарабын!
Петр Гоголев, СӨ Судаарыстыбаннай Мунньаҕын (Ил Түмэн) Бэрэссэдээтэлэ
-
0
-
0
-
0
-
0
-
0
-
0
