Тохсунньу 21 күнүгэр олохтоох дьаһалта үлэһиттэрэ, Рейман Рейманович суоппардаах нэһилиэк иһинээҕи хаһаайыстыбаларынан Данил Колесов бэлэх ууммут 72 куул уотурба, 27 куул эбиэс кэрийэн сылдьан түҥэттилэр. Данил Колесов Арбын олохтоохторун Вера Спиридоновна уонна Роман Иннокентьевич кыра уоллара буолар.
Колесовтар дьиэ кэргэттэрэ үс оҕолоохтор, улахан кыыстара Сардана Романовна элбэх оҕолоох ийэ, Дьокуускай куоракка олорор, үлэлиир. Улахан уоллара Роман Романович бааһынай хаһаайыстыба салайааччыта. Кыра уол Данил Калининград куорат олохтооҕо, бэйэтэ бас билэр тэрилтэлээх. Собуотугар олохтоох уолаттары ыҥыран ситиһиилээхтик үлэлии-хамсыы сылдьаллар.
Маны таһынан, Данил Колесов үөрэммит оскуолатыгар, учууталларыгар, үөрэнээччилэргэ стипендия, бириэмийэ, соһуччу бэлэх оҥорор үтүө дьыалаларынан биллэр эбит.
- Вера Спиридоновна, Роман Иннокентьевич ииппит оҕолорунан киэн туттабыт, холобур ылабыт! Оҕолорбут, уолаттарбыт хаһан да, ханна да буоллуннар дьоннорун, нэһилиэктэрин ааттарын ааттата турдуннар. Тус олохторугар кытаанах доруобуйаны, дьолу баҕарабыт, айыыһыттаргыт арыаллаатыннар диэн алгыспытын тиэрдэбит, - диэн олохтоох дьаһалта махтал тылларын тиэрдэр.
Ыспыраапка
Арбын нэһилиэгэ Нам улууһун саамай уһук, хотугу өттүгэр, икки улуу өрүстэр Лена уонна Алдан силбэһэр сирдэригэр сытар. Баай айылҕалаах, бултаах-астаах, саас аайы халаан уутугар барар нэһилиэгинэн биллэр. Ол да буоллар дьон-сэргэ таптаан олохсуйар сиринэн буолар. Хоту өттүттэн Кэбээйи улууһун Батамаайы нэһилиэгин, илин өттүттэн Уус-Алдан улууһун Өспөх нэһилиэгин кытта быысаһар. Нэһилиэнньэ сүрүн дьарыга – сылгы-сүөһү иитиитэ уонна дьоҕус урбаан.
- 0
- 0
- 0
- 0
- 0
- 0