Үөрэх

ХИФУ-га 2025 с. истипиэндьийэ кээмэйин эттэххэ, туйгуннук үөрэнэр 1 куурус устудьуоннарыгар 10854 солк., 5 куурустарга 14695 солк., 6 куурустарга 15583 солк. төлөнөр. Истипиэндийэ сыл ахсын үрдүү турар. Успуорка ситиһиилээх дьон үрдэтиллибит истипиэндьийэни 25 000 -35 000 солк., научнай-чинчийэр үлэнэн дьарыктанааччылар 30 000 солк., уопсастыбаннай үлэҕэ кыттааччылар 25 000 солк., федеральнай олимпиада кыайыылаахтара 30 000 солк. ылаллар.  

Сахабыт Сирин экэниэмикэтин сайыннарарга туһалаах, идэлэрин таба тайаммыт, үлэлэрин сөбүлүүр, ол аата көдьүүстээхтик үлэлиир-хамсыыр дьону иитэн таһаарарга, сөптөөх үөрэххэ киирэллэригэр сүбэлииргэ Ил Түмэн бэрэссэдээтэлин бастакы солбуйааччыта Александр Жирков Уус Алдан улууһун Мүрүтээҕи «Уолан» уолаттар гимназияларын 10 кылааһын үөрэнээччилэрин кытта көрсүһүүтүгэр сүрүн дакылааччыттары истэн баран оҕолор үөрэххэ киирэргэ интэриэһиргиир ыйытыктарын биэрдилэр.

Саян Бурнашев «Движение первых» хайысхатынан Арассыыйатааҕы оскуола сааһыгар Ставрополь куоракка кытта барарга үөрэххэ туттарсарга эбии баал ааҕыллар дуо? — диэн ыйыталаста. Онуоха Арассыыйа таһымыгар куонкуруска кыайдахха 7 баал, эрэгийиэн таһымыгар 5 баал, уопсайа саамай элбээбитэ 10 баал эбиллэрин туһунан чуолкайдаатылар.

Төлөбүрдээх үөрэххэ киирбит устудьуон атын үөрэххэ хайдах көһүөн сөбүн салгыы интэриэһиргээбитигэр, холобур, Москубаҕа МГУ-га көһөргө үөрэх төлөбүрэ 1,5 мөл. солк. диэн хардардылар. Оттон гражданскай авиация үөрэҕэ баар дуо диэбитигэр Дьокуускайга ХИФУ иһинэн суоҕун эттилэр.

Үөрэххэ киирэргэ туох чэпчэтии баарый диэн ыйытыкка ХИФУ тутар хамыыһыйатын начаалынньыга Елизавета Ильина тулаайах оҕолорго туһунан кубуота бэриллэрин туһунан эттэ. Кинилэргэ бүддьүөт 25 миэстэтиттэн 10% биэрэллэр, ол аата 2 миэстэ көрүллэр. Ити кубуотаҕа 1-2-ис бөлөххө киирэр инбэлиит оҕолор, тулаайахтар киирсэллэр.

Анал байыаннай дьайыы кыттыылааҕын оҕолоругар туһунан кубуота бэриллэр, кинилэр БКЭ-лэрин баала намыһах түгэнигэр үнүбүрсүөккэ кэлэн эксээмэн туттараллар. Онтон муҥутуур үрдүк баалын көрөн үөрэххэ ылаллар.

Гимназия үөрэнээччилэрэ юридическай бакылтыакка куонкурус уруккуттан үрдүк, өскөтүн онно киирбэтэхтэринэ ханна туттарсыахтарын сөбүн сурастылар. Юридическай бакылтыакка киирбэтэх дьон юридическай кэллиэскэ киириэхтэрин, онтон кэтэхтэн үрдүк үөрэххэ үөрэниэхтэрин сөбө этилиннэ.

Көрсүһүүнү түмүктүүргэ Александр Жирков: «Идэни талыы эр киһиэхэ кэнэҕэс ыал буолуохтаах таптыыр кыыһын таларын кэриэтэ. Сөбүлээбэт кыыскын кэргэн ыллаххына, үйэҥ тухары эрэйи көрүөҕүҥ. Идэҕэ эмиэ оннук. Дууһаҕыт сыппат үлэтин кэлин таптаан кэлэргит саарбах соҕус.

Киһи олоҕо сүрдээх кылгас, онон түҥ-таҥ сүүрэкэлээбэт, халтай дьаһаммат оннугар хара маҥнайгыттан сөбүлүүр идэҕитин талан, сөбүлүүр үлэҕитигэр үлэлии барыахтааххыт, таптыыр кыыскытын кэргэн ылыахтааххыт. Оччоҕуна киһи олоҕор табыллар, атыны бэйэтэ оҥостор», — диэн олохторун киэҥ аартыгар киириэхтээх оҕолорго соргулаах сүбэтин, ыллыктаах санаатын эттэ.

Хаартыска Саргын Скрябин, СИА.