Эдьигээнтэн олохтоохтор биллэрэллэринэн дьиэлэргэ киин ититэр ситим батарыайалара сыыйа сылыйан, сөптөөх ититэр кыраадыска чугаһаан иһэр.
ОДьКХ сулууспата биллэрэринэн, билигин Эдьигээҥҥэ салгын температурата -30 кыраадыс, кыбартаалынай хочуолунайга итиини биэрэр турбаҕа +75, төннүү турбаҕа +50 кыраадыс, 7 хочуол үлэлии турар. Бэҕэһээ туһааннааҕынан +65, +41 этэ.
Санаттахха, Эдьигээн хочуолунайыгар саахалы туоратыы үлэтэ миэстэтигэр Саха Өрөспүүбүлүкэтин ОДьКХ уонна энэргиэтикэҕэ миниистирэ Вячеслав Емельянов быһаччы салайыытынан ыытыллар, кини биллэрбитинэн, балаһыанньа сыыйа оннун булан иһэр.
Бэҕэһээ Ил Дархан Айсен Николаев бэйэтин телеграм ханаалыгар саахалы туоратыыга быһаччы үлэлэһэ сылдьар дьоҥҥо улахан махталын биллэрдэ.
Тохсунньу 5 күнүгэр Дьокууускайга ыытыллыбыт ЫБММ уонна баһаарынай куттал суох буолуутун хааччыйыы өрөспүүбүлүкэтээҕи хамыыһыйатын мунньаҕар Айсен Николаев Бэстээх нэһилиэгэр тутулла турар саҥа хочуолунай тутуутун салгыырга уонна төһө кыалларынан кылгас болдьоххо үлэҕэ киллэрэргэ соруйбута. Ону тэҥэ, нэһилиэккэ бородууктанан хааччыйыыны хонтуруолга тутарга эппитэ.
Хаартыска: Улусмедиа
-
0
-
0
-
0
-
0
-
0
-
0
