– Арассыыйа Федерациятын Бэрэсидьиэнэ Владимир Путин үгэс быһыытынан, бүгүн Федеральнай Мунньахха туһаайбыт этиитин оҥордо. Анал байыаннай эпэрээссийэттэн саҕалаан, бары эйгэнэн үлэ-хамнас ханнык хайысханан туох сыаллаах-соруктаах барыахтааҕын ыйда. Миэстэҕэ социальнай-экэнэмиичэскэй хайысханан үлэ төһө көдьүүстээхтик ыытыллара олохтоох салайыныы уорганнарыттан тутулуктаах диэтэ. Бэрэсидьиэн уонна Бырабыыталыстыба дьаһалтатыгар бастыҥ үлэлээх олохтоох салайыныы уорганнарын, бастыҥ көҕүлээһиннэри уо.д.а. өйөөһүн саҥа ырычаахтарын толкуйдуурга сорудахтаата. Тыла-өһө олохтооҕо, холкута астыннарда, эрэли күүһүртэ. Саалаҕа дойду салайааччыларын, чулуу дьоннорун ортотугар биһиги Ил Дархаммыт Айсен Николаев уонна дьокутааттарбыт олороллорун көрдөрбүттэрэ киэн туттунуулаах санааны үөскэттэ.
Бэйэбэр сыһыаннааҕынан иитэр-үөрэтэр эйгэҕэ этиитин ордук болҕойон иһиттим уонна сүрэхпинэн ылынным. Үөрэхтээһин үгэс буолбут тиһигин сөргүттэхпитинэ табыллар диэтэ. Ол эбэтэр урукку сэбиэскэй систиэмэ бастыҥ уопуттарыгар аныгы кэм ситиһиилэрин, саҥа технологиялары дьүөрэлээн үлэлиир соругу туруорда. Оннук да санаалаах буолан, быйылгы 2023 сылы дойду үрдүнэн Учуутал уонна уһуйааччы сылынан биллэрбит эбит. Онон, иннибитигэр үгүс үлэ күүтэр.
-
11
-
0
-
0
-
0
-
0
-
1
