Бастатан туран, национальнай бырайыактар, судаарыстыбаннай бырагыраамалар сыалларын ситиһэргэ болҕомтону күүһүрдэргэ, иккиһинэн, таһаҕаһы тиэйиигэ, халаан уутун уонна баһаары бохсууга бэлэмнэнии үлэлэрин, тэрээһиннэрин, былаанын оҥорууну салгыырга, үсүһүнэн, сүөһү уонна сылгы кыстыгын кэтээн көрүүтүн үрдэтэргэ диэн Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата иһитиннэрдэ.
- Сыл бастакы кыбаартала түмүктэннэ. Хантараак түһэрсиитин үлэтин түмүктүөххэ наада. Ити тутуу эрэ буолбакка, национальнай бырайыактар чэрчитинэн араас оборудованиелары атыылаһыыга сыһыаннаах, - диэтэ Айсен Николаев.
Дойду таһымыгар РФ Бэрэсидьиэнэ суолталаах быһаарыылары ылыммытын бэлиэтээтэ. Ол курдук, муус устар 1 күнүттэн от ыйын 15 күнүгэр диэри байыаннай сулууспаҕа ыҥырыы хампаанньатын ыытыы ыйааҕа баттанна. Манна былааннаммыт үлэни ыытарга сорудахтаата.
Маны тэҥэ дойду Бэрэсидьиэнэ 2023-2024 сс. ВДНХ территориятыгар «Арассыыйа» норуоттар икки ардыларынааҕы быыстапка-пуорум бэлэмнээһиҥҥэ уонна ыытыыга, бары тэрээһиннэргэ эрэгийиэннэр көхтөөхтүк кытталларыгар сүбэлээбитин бэлиэтээтэ, бырабыыталыстыбаҕа туһааннаах хайысхаҕа быһаарыылары ылынарга сорудахтанна. Ону сэргэ Уһук Илин муниципалитеттарыгар куорат эйгэтин тупсаҕай көстүүлээх тутуутун көҕүлээһинин олоххо киллэриигэ дойду бырабыыталыстыбатын уурааҕа тахсыбытын ыйда.
- Юрий Петрович Трутнев көмөтүнэн мэлдьи туруорсар уонна көрдөспүт быһаарыыбыт ылылынна, дойду Бэрэсидьиэнэ өйөөтө. Биһиэхэ, Уһук Илин куораттарга, куораты тупсарыыга бастыҥ бырайыактары олоххо киллэриигэ туспа куонкурус тэриллэн ыытыллыаҕа, – диэтэ Ил Дархан Айсен Николаев.
Ол курдук, уурааҕынан субсидияны биэрии быраабылата бигэргэннэ. Бастакы куонкурус ыам ыйын бастакы күнүгэр диэри ыытыллыаҕа. Бастыҥ бырайыактар 2023-2024 сс. хойутаабакка олоххо киллэриллиэхтэрэ. Иккис куонкурус бу сыл сэтинньи 1 күнүгэр диэри хойутаабакка ыытыллыаҕа. Манна эбии 50 бырайыактар талыллыахтара. Бастыҥ бырайыактары олоххо киллэриигэ субсидия орто кээмэйин суумата - 100 мөл. солк. Куонкурус ураты быраабыланан барыаҕа. Манна 250 тыһ. диэри нэһилиэнньэлээх куораттар кыттыыны ылыахтара. Ону тэҥэ, куонкуруска 5 тыһ. тахса нэһилиэнньэлээх пууннар кыттыахтара.
- Бу икки куонкуруска хайаатар да кыттыахтаахпыт! Муниципалитеттарынан сүбэлиир-амалыыр көмөнү оҥоруохха, - диэн Айсен Николаев эттэ.
-
0
-
0
-
0
-
0
-
0
-
0
