- Дойдуга экэнэмиичэскэй сааҥсыйалар киирбит уустук усулуобуйатыгар урут ситиһиллибит көрдөрүүлэри уонна иникки ылыныллыбыт тэтими ыһыктыбакка, өрөспүүбүлүкэ экэниэмикэтин үүнүүтүн хааччыйдыбыт. Демографияҕа көрдөрүүлэри тупсардыбыт – бу олох хаачыстыбатын үрдүүрүн көрдөрөр. Быйыл Саха Сиригэр киһи олоҕун уһуна рекорднай 73,5 сааска тиийэрин ситистибит. Сахабыт Сирин олохтоохторун ахсаана биир мөлүйүөнү куоһарда, - диэн Кирилл Бычков бэлиэтээтэ. Маны таһынан Саха Сиригэр анал байыаннай дьайыы кыттыылаахтарын өйүүр дьаһаллар салгыы ыытылла туралларын эттэ. - Тыылга биһиги сүрүн сорукпут – анал байыаннай дьайыы кыттыылаахтарын уонна кинилэр дьиэ кэргэттэрин өйөөһүн буолар. Хас биирдии маннык дьиэ кэргэттэргэ болҕомтобут күүһүрүөхтээх, - диэтэ премьер-министр.
Кэлэр биэс сылга СӨ Бырабыыталыстыбатын үлэтин сүрүн хайысхатынан дьадайыыны утары охсуһуу дьаһала быһаарылынна.
Биһиги чопчу сыаллаахпыт уонна соруктаахпыт - 2029 сылга диэри дьадайыы таһымын 2022 сыллааҕы көрдөрүүттэн икки төгүл түһэриэхтээхпит. 70 тыһыынчаттан итэҕэһэ суох өрөспүүбүлүкэ олохтоохторун дьадайыы таһымыттан таһаарыахтаахпыт. Үлэбит барыта ити сыалга туһуланыахтаах. Биллэн турар, ити уопсай сыалы ситиһэргэ муниципальнай тэриллиилэргэ уонна куорат уокуруктарыгар улахан эппиэтинэс сүктэриллэр. Бу киэҥ далааһыннаах үлэҕэ эһиги көхтөөхтүк кыттаргыт ирдэнэр. Манна күүстээх үлэ ыытыллара күүтүллэр. Олохтоох салайыныы бэрэстэбиитэллэрэ министиэристибэлэр уонна биэдэмистибэлэр бырайыактарын олоххо киллэриигэ ыкса бииргэ түмсэн кыттаргыт таһынан, муниципальнай тэриллии социальнай-экэнэмиичэскэй көрдөрүүлэрин уонна территориальнай уратыларын учуоттаан бэйэҕит бырайыактаргытын олоххо киллэриэхтээххит. Элбэх үлэ күүтэр, ону таһынан саҥа соруктар мэлдьи көдьүүстээх, көхтөөх үлэҕэ көҕүлүүр саҥа кыахтары саҕар, - диэн бэлиэтээтэ Кирилл Бычков.
Хаартыска: СИА.
-
0
-
0
-
0
-
0
-
0
-
0
