Тохсунньу 1 күнүттэн тыа сирин туризмын (агротуризм) туһунан сокуон олоххо киллэрилиннэ. Урукку өттүгэр суох бу сокуон тыа сиригэр, тыа хаһаайыстыбатыгар интэриэһи тардар, дьону, чуолаан эдэрдэри сиргэ, төрүт дьарыкка сыһыарар, кинилэри үлэ-хамнас саҥа көрүҥнэрин тэрийэргэ көҕүлүүр итиэннэ тыа сирин олохтоохторун дохуоттуур сыалтан оҥоһуллубут.
Агротуризм Европа дойдуларыгар балачча киэҥник тарҕаммыт буоллаҕына, Арассыыйаҕа саҥа саҕаланан эрэр дьарык. Күн бүгүҥҥү туругунан, дойду үрдүнэн биир тыһыынча кэриҥэ агротуристическай пиэрмэ баар, олор истэринэн 3500 ыалдьыттыыр дьиэ үлэлиир. «Ол эрээри бу олус кыра, баара суоҕа 2 % эрэ», -- диэн ааспыт сайын от ыйын 12 күнүгэр, сокуон барыла дьүүллэһиллэригэр Федерация Сэбиэтин социальнай бэлиитикэҕэ сис кэмитиэтин салайааччы Инна Святенко бэлиэтээн турар.
Ростуризм алтынньыга бигэргэппит тыа сирин туризмын тэрийиигэ ирдэбиллэрин быһыытынан, үлэ маннык көрүҥэр ылсар хаһаайыстыба итии-тымныы уулаах, толору хааччыллыылаах ыалдьыттыыр дьиэ (эрэгийиэн уратытынан көрөн гостиница, бунгало, шале, сурт, балыксыт дьиэтэ, булчут үүтээнэ) туттуохтаах. Онно массыынаны туруорар сир баар буолуохтаах, нүөмэрдэр гостиница тэриллэринэн, миэбэллэринэн хааччыллыахтаахтар. Тыа хаһаайыстыбатын министиэристибэтин ирдэбилинэн оҥоһуллар өҥө көрүҥнэригэр киирэллэр – дьону гостиницаҕа олохтооһун, тыа хаһаайыстыбатын табаарын атыылааһын, ыалдьыттарга экскурсияны, сынньалаҥы тэрийии, кинилэри бородууксуйаны оҥорууга, күннээҕи үлэҕэ-хамнаска кытыннарыы уо.д.а. Манна өссө тыа сирин олоҕун-дьаһаҕын, төрүт үгэстэри, фольклору итиэннэ тустаах сир айылҕатын уратытын билиһиннэрии эмиэ киирэр.
Тыа сирин туризмын тэрийэр хаһаайыстыбаларга (бааһынайдарга, чааһынай ыалларга) судаарыстыба өттүттэн субсидияны көрөр туһунан уураахха премьер-миниистир Михаил Мишустин ахсынньы 22 күнүгэр илии баттаата. Бу докумуон чэрчитинэн, көрүллэр көмө базаны тэринэргэ (ыалдьыттары түһэрэр дьиэни тутарга, сынньатар инфраструктураны тэрийэргэ, туристическай тэрили атыылаһарга) туттуллуохтаах. Кээмэйэ аччаабыта 10 мөл. солк., онуоха граны ылааччы бырайыагын сыанатын 25 %-а бэйэтигэр баар буолуохтаах эбит.
-
0
-
0
-
0
-
0
-
0
-
0
