Сүрүн иһитиннэриини үөрэх уонна наука миниистирэ Ирина Любимова оҥорбутун кэнниттэн, норуот дьокутааттара элбэҕи иҥэн-тоҥон ыйыттылар. Дьиэ кэргэн уонна оҕо аймах дьыалаларыгар сис кэмитиэт бэрэссэдээтэлэ Алена Атласова тыа сирин оскуолаларыгар кииннэммит уу ситимин уонна канализация боппуруоһа хайдах быһаарылларын ыйытта.
Онуоха улуустар дьаһалталарын чахчыларынан, бу сыалга судаарыстыба бүддьүөтүттэн 104,4 мөл солк. көрүллэрэ ирдэнэрэ, ыраас уонна туттуллубут куһаҕан (фекальнай) уулары баһар массыыналары атыылаһарга биир миллиард кэриҥэ харчы наадата быһаарылынна.
Биллэрин курдук, биһиги өрөспүүбүлүкэбит оскуолаларын хайа тыырбыт аҥаарыгар канализацията суох эрэгийиэн кэккэтигэр киирэр. (Олунньу 28 күнүгэр ыытыллыбыт Ил Түмэн бүддьүөккэ, үпкэ-харчыга, нолуок уонна сыана бэлиитикэтигэр сис кэмитиэтин мунньаҕар бу боппуруос эмиэ көрүллүбүтэ. Онно өрөспүүбүлүкэ оскуолаларын 50 %-нарыгар толору хааччыллыы, канализация, сиэптик, а.э. сылаас туалет баара, 140 оскуола сыһыары тутуллубут туалеттааҕа, аҕыйах оҕолоох дьоҕус оскуолалар биотуалеты туһаналлара, оттон аҕыс оскуолаҕа үөрэнээччилэр кыһыҥҥы тымныыга таһырдьа тахсаллара этиллибитэ).
Тэҥнии таарыйа эттэххэ, Тыва оскуолаларын 37 %-а канализациялаах. Арассыыйа Үөрэҕин уонна наукатын министиэристибэтин чахчытынан, куорат 1 348 уонна тыа сирин 5 680 оскуолаларыгар канализация суох, куорат 1 232 уонна тыа сирин 5 208 оскуолаларыгар уу ситимэ суох, куорат 1224 уонна тыа сирин 4919 оскуолаларыгар киинтэн ититии суох.
- 0
- 0
- 0
- 0
- 0
- 0