Бэлиитикэ

Станислав Луковцев  1994 с. Уус Алдаҥҥа «Умсулҕан» коллекционердар түмсүүлэрин тэрийбитэ. 1999 с. коллекциятын 20 сылыгар  «Увлеченный авиацией» тус быыстапкатын тэрийбитэ. Саха сирин авиатордарын састаабыгар киирсэн Жуковскай куоракка  «МАКС-200» авиакосмическай салоҥҥа ыытыллыбыт бөдөҥ Россиятааҕы быыстапкаҕа кыттыбыта. 2005 с.  Станислав Луковцев Социалистическай Үлэ Геройа В.И.Кузьмин аатынан бириэмийэ лауреата буолбута. 2012 с. – Коллекционердар аан дойдутааҕы Сойуустарын чилиэнэ. Улуу Кыайыы 70 сылыгар аналлаах «Летчики – Герои Советского Союза» өрөспүүбүлүкэтээҕи филателистическай быыстапка кыайыылааҕа.

Бүгүн Станислав Николаевич сааһын тухары авиациянан күүскэ үлүһүйбүт киһи өрөспүүбүлүкэ саамай биллиилээх уонна ытыктанар коллекционера. Билиҥҥи кэмҥэ кини коллекциятыгар 5000 значок, 1500 маарка уонна аккырыыкка, 400 кинигэ уонна 200-тэн тахса халандаар баара биллэр.

Саха Өрөспүүбүлүкэтин Ил Түмэнин Бэрэссэдээтэлин бастакы солбуйааччы Александр Жирков быыстапканы арыйарыгар Станислав Луковцев - космос, авиация ыралаах сэбиэскэй көлүөнэ кэккэтиттэн үүнэн тахсыбытын туһунан эттэ.

Салгыы Александр Николаевич: «Россия Президенэ В.В. Путин Ыйааҕынан Дьокуускай куоракка «Килбиэннээх Үлэ  куората»  бочуоттаах аат иҥэрилиннэ. Бу үрдүк аат биһиги киин куораппытыгар иҥэриллиитигэр сэрии сылларыгар «Алсиб (Аляска-Сибиир)» диэн Дьокуускайынан стратегическай суолталаах трасса ааспыта сүрүн суолталанна», - диэн эттэ.  Трасса административнай киининэн бу салгын суолун ортотугар турар Дьокуускай куорат буолбута. Уэлькаль-Дьокуускай-Красноярскай трассата, летчиктар, инженердэр, техниктэр, олохтоох нэһилиэнньэ эрдээхтик турунан бары бииргэ үлэлээһиннэрин түмүгэр сэрии кэмигэр саамай эрэллээҕинэн биллибитэ. «Саха сирин олохтоохторо Аҕа дойду улуу сэриитин ыарахан сылларыгар Аляска-Сибиир  трассанан 8 тыһыынча кэриҥэ бойобуой сөмөлүөтү аһардыбыттара. Бу, ханна да холобура суох күүстээх үлэ туһунан биһиги дьоммут ытык өйдөбүллээхтэр», – диэн бэлиэтээтэ.

Саха сирин авиациятын бочуоттаах үлэһитэ, СӨ бэчээтин туйгуна Валерий Стефанскай уонна СӨ култууратын үтүөлээх үлэһитэ Борис Корниенко Станислав Луковцевы уонна быыстапка кыттыылаахтарын «Авиатордар марштара» ырыанан эҕэрдэлээтилэр.

Аатырбыт коллекционеры СӨ тыраанспарын уонна суол-иис хаһаайыстыбатын миниистрин солбуйааччы Семен Коркин, Росавиация МТУ Саха сиринээҕи салаатын салайааччытын солбуйааччыта Алексей Борисов, «Якутия» авиакомпания АО ген. директорын бастакы солбуйааччы Сергей Анциферов, Бүтүн Россиятааҕы авиация үлэһиттэрин Саха сиринээҕи өрөспүүбүлүкэтээҕи профсоюзнай тэрилтэ  бэрэссэдээтэлэ Айсиэн Дягтярев, Уус Алдан улууһун авиатордарын түмсүүтүттэн Николай Копырин, Дьокуускайдааҕы гражданскай авиация авиационнай-техническай училищетын курсааннара о.д.а. эҕэрдэлээтилэр.

Бу күн Станислав Николаевич Луковцевка бэйэтин идэтинэн оҕолору музыка, искусство кэрэ эйгэтигэр угуйууга өр сыллаах эҥкилэ суох үлэтин уонна улуус, өрөспүүбүлүкэ общественнай олоҕор холобур буолар кыттыытын иһин  Саха Өрөспүүбүлүкэтин «Саха АССР 100 сыла» диэн бэлиэ наҕараада туттарылынна. Итини сэргэ Ил Түмэн бастакы вице-спикерэ маннык наҕарааданы өрөспүүбүлүкэ кырдьаҕас суруналыыһыгар, саха спордун үөрэтээччигэ уонна тарҕатааччыга, аатырбыт спортивнай комментаторга Александр Васильевич Васильевка-Көрдүгэҥҥэ туттарда. Александр Васильевич Саха сирин тиэмэтигэр оҥоһуллубут араас бэлиэлэр, значоктар коллекцияларын хомуйууну саҕаласпыт, бу туһалаах дьарыкка үгүс киһини умсугуппут,  бэйэлэрин биир идэлээхтэрин, өрөспүүбүлүкэ спорду сэҥээрээччилэрин ортолоругар улаханнык биллэр, ытыктанар киһи.

Станислав Луковцев коллекциятын быыстапката Саха Өрөспүүбүлүкэтин Ил Түмэнигэр арыллыбытын ситимтэн билэннэр, Москва, Новосибирскай, Красноярскай, Хабаровскай о.д.а. Россия куораттарын коллекционердара Станислав Николаевиһы эҕэрдэлээтилэр. Атын куораттар коллекционердара өрөспүүбүлүкэ үрдүкү салалтата коллекционер сыралаах дьарыгын сыаналыырын, болҕомтотун уурарын сөхпүттэр.

Элбэх суруктан биири-иккини билиһиннэрэбит: «Вот лучший пример, как в Республике Саха  относятся к людям творческим», «Станислав Николаевич, я рад за Вас! Это огромный труд и результат Вашего многолетнего увлечения и служения делу сохранения истории нашей гражданской авиации. Видно, как уважают Вас земляки и руководство республики. Это радует меня, так как я тоже коллекционер и мне есть на кого равняться. Хотя сделанное Вами огромного масштаба и вряд ли досягаемо. Дальнейших Вам успехов, здоровья и удачи!».