Төгүрүк остуолга сүрүн иһитиннэриилэри СӨ Доруобуйа харыстабылын миниистирэ Лена Афанасьева уонна СӨ Ис дьыалаҕа министиэристибэтин участковай полиция уонна сокуоннай саастарын ситэ илик оҕолор дьыалаларыгар отдел үлэтин тэрийии салаатын начаалыныгын эбээһинэһин толорооччу Филипп Гаврильев оҥордулар.
Төгүрүк остуол кыттыылаахтара арыгыны атыылыыры сааһынан хааччахтааһын боруогун улаатыннаран, 21 сааска тиэрдэн СӨ сокуоннарыгар уларытыылары киллэргэ эттилэр. Хас биирдии нэһилиэккэ арыгыны атыылыыры хонтуруоллуур үлэни кытаатыннарарга, арыгы атыылааһынын кэһиини туоратар сыалтан «контрольная закупка» курдук дьаһаллары ыытарга, арыгылаах түүҥҥү тэрилтэлэр үлэлиир бириэмэлэрин кылгатарга уонна чөл олохтоох нэһилиэктэр ахсааннарын элбэтэргэ этии киллэрдилэр.
Парламент бэрэссэдээтэлин солбуйааччы Александр Подголов бэлиэтээбитинэн, арыгыттан тутулуктаах буолуу дьиэ кэргэн олоҕун сатарытар, батталы уонна буруйу оҥорууну улаатыннарар, нэһилиэнньэ үөрэҕириитин уонна көхтөөх үлэтин таһымын намтатар. «Арыгылааһын курдук социальнай иэдээни бииргэ үлэлээһин түмүгэр тохтотуохха сөп. Интэриэстээх өрүттэр бары бииргэ түмүстэхпитинэ эрэ үтүө түмүктэри ылыахпыт, итиэннэ олохпут хаачыстыбатын тупсарыахпыт», - диэтэ.
Бу туһунан сиһилии «Ил Түмэн» парламент хаһыатын олунньу 21 күнүнээҕи таһаарыытыгар ааҕаарыҥ.
Хаартыска Василий Кононов түһэриитигэр.
-
0
-
0
-
0
-
0
-
0
-
0
