Мунньаҕы туһааннаах сис кэмитиэт бэрэссэдээтэлэ Алексей Еремеев салайан ыытта. Үрдүк дуоһунаска хандьытааты СӨ Баһылыгын уонна Бырабыыталыстыбатын дьаһалтатын салайааччы Афанасий Владимиров: “Андрей Владимирович быйыл сайын от ыйын бүтүүтүгэр ананыаҕыттан өрөспүүбүлүкэбит интэриэһин федеральнай таһымҥа туруулаһарга кимиилээхтик киирсэр. Саха сирин хоту-соҕуруу эҥээрдэринэн сылдьан, олоҕу-дьаһаҕы билистэ. Жатайга уу аалларын оҥоруу бырайыагар ыкса ылыста. Олох-дьаһах коммунальнай хаһаайыстыбатыгар баар кыһалҕалары илэ биллэ-көрдө...” – диэн билиһиннэрдэ.
Ол кэнниттэн Ил Түмэн дьокутааттара тургутан көрдүлэр. Владимир Чичигинаров ханнык сыалы-соругу уһулуччу тутуоҕун, дьадайыыны икки бүк намтатарга туох дьаһаллары ылыныаҕын ыйытта. “Биллэн турар, тыа хаһаайыстыбатын сайыннарыы уонна бырамыысыланнаска үлэ миэстэтин таһаарыы сүрүн сыал-сорук быһыытынан көрөбүн. Манна уматык уонна ас сыаната олус үрдүгүн сөхтүм. Систиэмэни уларытан, сыана удамыр буоларыгар үлэлэһиэхпит”, -- диэтэ.
Алена Атласова элбэх оҕолоох ыалларга сир учаастагын биэриини хайдах быһаарыаҕын чуолкайдаспытыгар: “Мин бэйэм элбэх оҕолоох дьиэ кэргэҥҥэ иитиллибит киһибин. Улахан дьиэ кэргэттэр кыһалҕаларыгар кыһаллыбат буоллахпытына, ким элбэх оҕолоно сатыай? Өрөспүүбүлүкэ олохтоохторугар социальнай хаартаны аан маҥнай таһааран эрэбит. Туох баар чэпчэтии онно түмүллэр буолуоҕа”, -- диэн хоруйдаата.
Павел Ксенофонтов федеральнай киини уонна бырамыысыланнас хампаанньаларын кытта хардарыта сыһыаҥҥа туох саҥаны киллэриэҕин билээри гыммыта салгыҥҥа ыйанан хаалла. Оттон бүддьүөт дохуоттуур чааһын үрдэтиигэ хайдах үлэлиэҕин туоһуласпытыгар: “Өрөспүүбүлүкэҕэ рентабельнай бородууктаны оҥорон таһаарарга дьулуһуохтаахпыт. Биһиги логистикабытыгар тиэйии-таһыы ороскуота улаханынан, холобур, сымыыты оҥорон таһаарыы даҕаны бэйэтин толуйбат. Кытайга таас чоҕу атыылыырбыт улахан барыһы аҕалар. Тимир рудата элбэх. Металлургияны кытта металлопрокаты холбуохха сөп. Рентабельноһы сайыннардахпытына, дохуот үрдүөҕэ”, -- диэн хардарда.
Андрей Николаев: “Мэдиссиинэ үлэһиттэрин сарбыйыы салгыы ыытыллыа дуо?” -- диэн ыйыппытыгар ханнык да сарбыйыы былааннамматын, миэдиктэри уонна учууталлары сарбыйары төрүт утарарын эттэ. Истиэххэ үчүгэй. Дьыалатыгар хайдах буолар? Андрей Тарасенко өрөспүүбүлүкэ собуоту былдьаппытын хомуруйардыы саҥарда, утарсан “мүлчү туппуппут” түмүгэр Амур уобалаһын бүддьүөтэ икки төгүл үрдээбит.
Санатан эттэххэ, Ил Дархан Ыйаахха илии баттыан иннинээҕи бүтэһик дьүүллэһии сэтинньи 10 күнүгэр Ил Түмэн дьокутааттарын уопсай мунньаҕар ыытыллыа.
-
0
-
0
-
0
-
0
-
0
-
0
