Дьокутааттар Бырабыыталыстыба Бэрэссэдээтэлин бастакы солбуйааччы дуоһунаһыгар Кирилл Бычков кандидатуратын дьүүллэһэллэригэр кини биһиги өрөспүүбүлүкэбитигэр Бырабыыталыстыба Бэрэссэдээтэлин солбуйааччынан икки сыл үлэлээн бэйэтин дьыалабыай, эппиэтинэстээх салайааччы быһыытынан толору көрдөрбүтүн бэлиэтээн туран, өйүүллэрин биллэрдилэр. Норуот дьокутаата Мария Христофорова: “Цифровизацияҕа киирии тэтимнээхтик ыытыллыбытын онлайн эрэсиимҥэ көһөн үлэлиирбитигэр үчүгэйдик биллибит. Онуоха Кирилл Евгеньевич үтүөтэ улахан”, -- диэтэ уонна пандемия кэмигэр, чуолаан, кэлиҥҥи 3 ыйга дьон үлэлээх-дьарыктаах буолуутугар балаһыанньа хайдаҕын чуолкайдаста. К.Бычков иһитиннэрбитинэн, быһыы-майгы төһө да уустугун иһин, үлэтэ суох буолуу көрдөрүүтэ сыыйа намтыыр эбит.
Бастакы солбуйааччы дуоһунаһыгар олоруохтаах салайааччыттан Владимир Прокопьев, Валерий Лютай, Дмитрий Семенов, Аркадий Семенов, Любовь Явловская, Павел Ксенофонтов, Юрий Николаев, Алена Атласова, Алексей Еремеев, Антонина Григорьева ыйыталастылар уонна салгыы өссө таһаарыылаахтык, ситиһиилээхтик үлэлииригэр алҕаатылар. Кирилл Бычков быстах-остох хоруйдарыттан тумуһурдаатахха, сүрүн болҕомто тутуута саҕаламмыт эбийиэктэри ситэриигэ ууруллуо, дьоҕус авиацияны тилиннэриигэ систиэмэлээх үлэ ыытыллыа, Онкодиспансер былааннаммыт кэмигэр үлэҕэ киллэриллиэ.
Дьокутааттар салгыы Бырабыыталыстыба бэрэссэдээтэлин солбуйааччылар Сергей Местников уонна Михаил Никифоров кандидатураларын көрдүлэр. Дьиҥэр, “биһиги харахпыт ортотугар үүммүт каадырдар, үчүгэйдик билэбит” диэн кэпсэтиигэ элбэх бириэмэни бараабатылар. Арай, С.В.Местниковтан тирээн турар кыһалҕаны дьокутааттар Валерий Лютай уонна Мария Христофорова токкоолостулар уонна чуолкай быһаарыыны күүтэллэрин эттилэр. Ол – оскуолаларга үрдүттэн үөрэх сэтинньи 9 күнүттэн саҕаланарыгар сыһыаннаах. “Үрдүттэн үөрэх туһааннаах куоракка эбэтэр нэһилиэккэ эпидемиологическай быһыыттан-майгыттан тутулуктаах буолуоҕа. Чопчу Дьокуускайы ыллахха, бу күннэргэ куорат дьаһалтатын уонна Үөрэх министиэристибэтин кытта сүбэлэһэн, дьаһал тахсыаҕа”, -- диэтэ Сергей Васильевич. Оскуолаларга миэдиктэри төннөрүүгэ эмиэ үлэлэһэн, быһаарыы ылынарга эрэннэрдэ. Оттон учууталлар көмүскэллээх буолууларыгар хоруйдаан: “Атын салааларга курдук, 65-тэн үөһэ саастаах учууталлар дьиэлэриттэн үлэлииллэр. Ковиды утары быһыы, препарат кэлэ илигинэн, оҥоһулла илик”, -- диэтэ.
Ити курдук Ил Түмэн судаарыстыбаны тутууга уонна сокуоҥҥа сис кэмитиэтин чилиэннэрэ Андрей Тарасенко баһылыктаах Бырабыыталыстыба саҥа састаабыгар үлэлиэхтээх хандьытааттары эр-биир көрөннөр, санааларын, былааннарын истэн бараннар, сүүс бырыһыан сөбүлэһэллэрин биллэрдилэр. Санатан эттэххэ, Бырабыыталыстыба саҥа салалтатын бүтэһиктээхтик сэтинньи 10 күнүгэр Ил Түмэн дьокутааттарын пленарнай мунньаҕар көрүөхтэрэ.
-
0
-
0
-
0
-
0
-
0
-
0
