Мунньаҕы Ил Түмэн бэрэссэдээтэлин солбуйааччы Виктор Губарев уонна кэмитиэт бэрэссэдээтэлэ Елена Голомарева салайан ыыттылар. Сүрүн дакылааты СӨ бырабыыталыстыбатын бэрэссэдээтэлин солбуйааччы Михаил Никифоров оҥордо.
Михаил Никифоров дакылаатыгар бэлиэтээбитинэн, хотугу улуустары аһынан-үөлүнэн хааччыйыы кээмэйин 10% судаарыстыбаннай тэрилтэ оҥорор, хаалбыт 90 % урбаанньыттар санныларыгар сүктэриллибит. Судаарыстыбаннай сорудаҕынан икки тэрилтэ дьарыктанар этэ – “Якутоптторг” Ауо уонна “Туймаада-Агроснаб” ААУо. Бу соторутааҕыта икки тэрилтэни холбоон, биир тэрилтэ гыммыттар. Михаил Никифоров хотугу улуустары аһынан-үөлүнэн хааччыйыы сүнньүнэн баар кыһалҕалартан тырааныспарт ороскуотун толуйарга көрүллэр субсидия улааппатын, килиимэт уларыйан кыһыҥҥы суол хойут аһылларын ыйда. Ону таһынан кини оройуон кииннэриттэн ыраах сытар нэһилиэннэлээх пууннарга бородууктаны тиэрдиигэ судаарыстыба бүддьүөтүттэн үп көрүллүбэтин, муниципалитеттар үптэригэр бу үлэ сүктэриллэн, бытааннык ыытылларын туһунан эттэ.
Мунньахха норуот дьокутааттарын, бырабыыталыстыба, биэдэмэстибэлэр бэрэстэбиитэллэрин таһынан, хотугу улуустар нэһилиэктэрин баһылыктара кытыннылар. Баһылыктар бородууктаҕа сыана үрдүгүн, оҕо аһылыгын чэпчэтиигэ миэрэ көрөллөрүн, оҕуруот аһын уонна хортуоппуйу тиэрдэр “күөх көрүдүөрү” элбээтиннэрэллэрин туһунан эттилэр.
Мунньах түмүгэр хотугу улуустары хааччыйар урбаанньыттары өйүүр миэрэ ылыллыахтааҕын, оттон бородууктаны тиэрдэр судаарыстыбаннай тэрилтэҕэ көрүллэр субсидия кээмэйин улаатыннарар уолдьаспытын туһунан этиилэр киирдилэр.
Киэҥ ыҥырыылаах мунньах туһунан сиһилии “Ил Түмэн” хаһыат кэлэр нүөмэригэр ааҕыҥ.
-
0
-
0
-
0
-
0
-
0
-
0
