Алтынньы 28 күнүгэр Судаарыстыбаннай Дуума пленарнай мунньаҕар 2022-2024 сылларга федеральнай бүддьүөт туһунан сокуон бырайыагын бастакы көрүүтэ буолла.
Вячеслав Володин бэлиэтииринэн, дойду сайдар сыалларын ситиһэргэ бүддьүөт суолталаах үнүстүрүмүөн буолар. Онон Судаарыстыбаннай Дуума бэрэссэдээтэлэ тустаах кэмитиэттэригэр сокуон бырайыагын иккистээн ааҕыыга бэйэлэрин этиилэрин бэлэмнииргэ сорудахтаата.
Эрэгийиэннэр бүддьүөттэрин хааччыллыыта
Вячеслав Володин эрэгийиэннэр икки ардыларыгар бүддьүөтүнэн хааччыллыыга улахан "аппа", итиэннэ РФ субъектарыгар үлэ ресурсаларын хаалларыы кыһалҕата баарын болҕойон бэлиэтээтэ уонна: «Биһиги ити тиэмэлэри дьүүллэһиигэ таһаарыахтаахпыт, ону сөптөөх дии саныыбын, тоҕо диэтэр, элбэх бэрээдэктээһин уонна көмө миэрэлэрэ баар буолуон сөп, ол иһин биһиги эрэгийиэннэргэ нэһилиэнньэ кыһалҕата суох тиийинэн олорор усулуобуйатын тэрийиэхтээхпит, ол усулуобуйа Москва уонна да атын сайдыылаах куораттардыын араастаһыа суохтаах”, – диэтэ.
Бүгүҥҥү күҥҥэ Москва уонна РФ атын куораттарын икки ардыгар олох усулуобуйата чыҥха атынын Судаарыстыбаннай Дуума бэрэссэдээтэлэ бэлиэтиир. "Мэдиссиинэ, үөрэх, олох онтон да атын эйгэтин хаачыстыбалара дойду киин куоратыттан туох даҕаны уратыта суох буолуохтааҕын ситиһэр тоҕоостоох. Чуолаан Уһук Илиҥҥэ үлэлиир кыра ыстаапкалаах ипотека уопутун атын эрэгийиэннэргэ киллэриэххэ сөп", -- диир Вячеслав Володин.
«Маны хамнаска сыһыаран уонна ону учуоттаан, ыстаапканы көннөрөн биэрэр сөп буолуо этэ. Оччоҕо кыра хамнастаах дьон дьиэ боппуруоһун быһаарар кыахтаныахтара”, – диир Володин. Бу этиллибит санаалар олоххо киирэллэрэ буоллар, олохпут төһөлөөх тупсуо, чэпчиэ этэй?.. Эрэнэ күүтэбит.
-
0
-
0
-
0
-
0
-
0
-
0
