Кини сылын аайы Эбээн-Бытантай улуустааҕы социальнай харалтатыгар, элбэх оҕолоох дьиэ кэргэттэргэ, доруобуйаларыгар хааччахтаах оҕолорго анаан, Саҥа дьыллааҕы бэлэхтэри ыытар үтүө үгэстээх.
Быйыл да, Иван Иванович ол үгэһин кэспэтэ, 22 кырачааҥҥа Тымныы Кырдьаҕас кэһиитин оҥорон ыытта.
Итини тэҥэ кини “Бытантай уоттара” хаһыаты кытары ыкса ситимнээхтик үлэлиир, куруутун билсэ олорор. Быйыл Саха АССР тэриллибитэ 100 сылыгар биллэриллибит “Бэтэрээни сурут” өрөспүүбүлүкэтээҕи аахсыйаҕа кыттыһан, тус бэйэтин суотуттан 10 киһиэхэ хаһыакка сыллааҕы сурутууну бэлэхтээтэ.
Эмиэ биир үтүө үгэһинэн Иван Иванович хаһыс да сылын аайы хас биирдии сурутааччыга, тыаҕа-ойуурга үлэлиир дьоммутугар, сыллааҕы халандаары бэлэх ыытарын хаһыат бастакы нүөмэрин кытта туттарыллар.
Маны таһынан үүммүт сылга норуот дьокутаата Иван Андреев оҕо уһуйааннарыгар кырачааннар өй-санаа өттүнэн сайдалларыгар бастакы билиилэри, үөрүйэхтэри биэрэр сахалыы-нууччалыы, оттон оскуола оҕолоругар өрөспүүбүлүкэбит устуоруйатын кэрэһилиир, чаҕылхай дьонун сырдатар араас элбэх кинигэ кэмпилиэгин бэлэх ыыппытын, улуус дьаһалтатын дьиэтигэр үөрүүлээх быһыыга-майгыга туттардылар.
Эбээн-Бытантай улууһун олохтоохторо Иван Ивановиһы дьоҥҥо-сэргэҕэ тылынан буолбакка, дьыаланан көмө-өйөбүл буолар дьокутаатынан билэллэр.
Биэс хотугу оройуону түмэр Хотугу национальнай уокуруктан Ил Түмэн дьокутаата сылын аайы доруобуйаларыгар хааччахтаах оҕолорго Саҥа дьыллааҕы бэлэх уунан үөрдэрэ номнуо үтүө үгэскэ кубулуйда. Ол да иһин, Иван Иванович минньигэс бэлэҕин оҕолор сылын аайы долгуйа күүтэллэр.
Кини Ил Түмэҥҥэ бэйэтин сүрүн эбээһинэһин – өрөспүүбүлүкэ сокуоннарын оҥорууну уонна ылыныыны -- кытары кыах баарынан быыбардааччыларыгар көмөлөһөр, кинилэри кытта көрсүһэр, ону тэҥэ улууска баар кыһалҕалары быһаарыыга баһылыктарга өйөбүл буолар.
Сардаана Копырина
-
0
-
0
-
0
-
0
-
0
-
0
