- Соторутааҕыта Ил Түмэн өрөспүүбүлүкэ бүддьүөтүн сокуонугар тыа хаһаайыстыбатын сайыннарыытыгар үгүөрү элбэх үбү-харчыны ыытары былааннаабыта. Сири хорутар үлэ киһитэ сөптөөх хамнаһы ылыахтаах. Билигин уустук кэмҥэ үлэһит киһи сөптөөхтүк биһирэниэхтээх, бэйэбит оҥорон таһаарар бородууксуйабытынан хааччылыахтаах тустаахпыт. Үөрэх туһунан сокуоҥҥа уларытыы киирэрин ситиспиппит, чуолаан, оҕолору үлэҕэ иитиигэ.
Аҕа сүбэһиттэргэ ураты болҕомто ууруллуоҕа. Үлэ кэлэктииптэригэр уонна араас салааларга кинилэр эдэр учууталлары арыаллыахтара. Аҕа сүбэһит буолууну сайыннарыахтаахпыт уонна биһириэхтээхпит. Ийэ сыл чэрчитинэн «Үйэ оҕолоро» хапытаалын көмөтүнэн, быйыл күн сирин көрбүт оҕолорго 100-түү тыһ. солк. ананар буолбута. Эмиэ ити кэмҥэ биһиги парламеҥҥа Үйэ оҕолоро» хапытаалынан 30 тыһ. солк. суумалаах харчыны дьиэ кэргэн тус сыаллаах наадыйыытыгар, чуолаан, коляска уонна таҥастарын-саптарын атыылаһалларыгар ыытары туруорсубуппут. Бу бэртээхэй саҕалааһын өссө биэс сыл устата салҕаныа уонна оҕо төрөөһүнүн үрдэтиигэ олус үчүгэй өйөбүл буолуоҕа.
-
3
-
0
-
0
-
0
-
0
-
0
