- Госдума тутууга уонна ОДьКХ кэмитиэтигэр кириисис кэмигэр Арассыыйа олохтоохторун уонна биисинэһи өйөөһүҥҥэ эбии дьаһаллары бэлэмнээтилэр. Чуолаан, дьокутааттар ОДьКХ төлөбүрүттэн элбэх оҕолоох ыаллары босхолуурга уонна 65-тэн үөһэ аҕам саастаах гражданнарга төлөбүр сыанатын 70% субсидиялыырга этии киллэрдилэр, - диэн «Известия» суруйар.
Кэмитиэт бэрэсээдээтэлин солбуйааччыта Светлана Разворотнева быһаарыытынан, Госдума дьокутааттара элбэх оҕолоох ыалларга ОДьКХ төлөбүрүн 100% субсидиялыырга этии көтөхтүлэр. Маны таһынан, парламентарийдар ыйыллыбыт өҥөлөрү төлүүргэ бааннар ылар хамыыһыйаларыттан босхолуохтарын баҕараллар, оттон управляющай хампаанньаларга (УК) 0,1% диэри хааччахтыырга ыҥырдылар. Көҕүлээһини РФ Тутуу министиэристибэтигэр ыыттылар, сотору кэминэн дойду бырабыыталыстыбатыгар киллэриэхтэрэ.
Маны сэргэ дьокутааттар үлэтэ суох ыалларга ОДьКХ төлөбүрүн субсидиялыырга, итиэннэ биирдиилээн дьоҥҥо уонна управляющай хампаанньаларга Киин баан сүрүн ыстаапкатыттан пеня ааҕылларын тохтоторго этиннилэр. Светлана Разворотнева этэринэн, пеня ааҕыытыгар атын ньыма оҥоһуллуохтаах. Госдума тутууга уонна ОДьКХ кэмитиэтин чилиэнэ Александр Якубовскай гражданнары өйүүр бары дьаһаллары сөптөөх быһаарыынан ааттаата.
- Онуоха эрэгийиэннээҕи бүддьүөттэргэ дохуот киллэриигэ ноҕорууска үөскүүрүнэн, субъектарынан дохуоту таһынан ороскуоттара үрдүк буолуо суохтааҕа учуоттаныахтаах, - диэн тоһоҕолоото.
Санаттахха, дойду бааннарын дааннайдарынан Саха Сиригэр ОДьКХ төлөбүрүн орто кээмэйэ 3500 солк. саҕаланар. СӨ Үлэ уонна социальнай көмүскэл министиэристибэтин дааннайынан, 2021 сыл тохсунньу 1 күнүнээҕи туругунан өрөспүүбүлүкэҕэ 31562 элбэх оҕолоох ыал олорор, онно 106530 оҕо иитиллэр.
-
0
-
0
-
0
-
0
-
0
-
0
