Ол гынан баран, билиҥҥи систиэмэнэн ылыныллыбыт сорук олоххо киирэр кыаҕа суох. Ол иһин, «Биир ньыгыл Арассыыйа» баартыйа ити үлэни түргэтэтэргэ аналлаах механизмнары толкуйдаан анал этиилэри киллэрдэ. Итиннэ киһи сэргиирэ диэн дьиэттэн ситимҥэ холбонуу нэһилиэнньэҕэ босхо буолуохтаах. Тустаах баартыйа Генеральнай сэбиэтин сэкиритээрэ Андрей Турчак ити боппуруоска аналлаах мунньахха бүгүҥҥү күҥҥэ гааһы холбонуу сыаната саамай үрдээбитэ 400 тыһ. солк. тэҥнэһэр диэн эттэ. Билигин гааһы холбооһунунан эрэгийиэннэр бэйэлэрэ быһаччы дьарыктаналлар. «Газпром» гаас сүрүн утаҕын тардар, эрэгийиэннээҕи хампаанньалар нэһилиэнньэни кытта дуогабар түһэрсэн, дьиэлэригэр диэри ситими тардаллар. Бары билэрбит курдук, дьиэҕэ гаас ситимин тардыы сыаната ситим төһө ыраах тардыллан кэлэриттэн улахан тутулуктааҕа биллэр. Онон манна сыана араас буолар. «Биир ньыгыл Арассыыйа» баартыйа дьокутааттара дьиэҕэ диэри гааһы тардыы буор-босхо буолуохтаах, нэһилиэнньэ гаас хочуолун уонна билиитэни ыларга эрэ ороскуотуруохтаах дииллэр. «Хампаанньалар ороскуотурбуттарын судаарыстыбаннай араас хабааннаах бырайыактарынан сабыныахтаахтар эбэтэр НДПИ нолуогар чэпчэтиилэр көрүллүөхтээхтэр», -- диэн Андрей Турчак санаатын үллэстибит. Бу этиилэр сүрүннэрэ «РФ эрэгийиэннэрин гаастааһын уонна гааһынан хааччыйыы 2030 сылга диэри» диэн бырайыак сүрүн оҥкулунан буолуохтаахтар. Бу боппуруоһу быһаарыыга тустаах баартыйа анал оробуочай бөлөҕү тэрийиэҕэ. Онно «Газпром межрегионгаз», РФ Тыатын хаһаайыстыбатын, Тутууга уонна Үпкэ министиэристибэлэрин салайааччылара, бэрэстэбиитэллэрэ киириэхтэрэ.
-
0
-
0
-
0
-
0
-
0
-
0
