Форумҥа Саха сирин Арассыыйа иһигэр сыыппаралааһын сайдыытынан бастыҥ эрэгийиэнинэн биллэрдилэр. Ону туоһулуур статуэтканы өрөспүүбүлүкэ Ил Дарханыгар Айсен Николаевка уонна инновация, сыыппара уонна инфокоммуникационнай технологиялар сайдыыларын миниистиригэр Анатолий Семеновка туттардылар.
Айсен Николаев форуму тэрийээччилэргэ уонна эспиэрдэргэ үрдүк сыанабылы биэрбиттэригэр махтанна уонна өрөспүүбүлүкэҕэ сыыппаралааһын өттүгэр туох үлэ-хамнас бара турарын кэпсээтэ.
“Мин санаабар, сыыппаралааһын эрэгийиэни түргэнник сайыннарар кыахтаах. Сирбит-уоппут киэҥэ, суолбут-ииспит мөлтөҕө, айылҕабыт тыйыс усулуобуйата – бу барыта атын эрэгийиэннэри кытта социальнай экэнэмиичэскэй сайдыыбытынан тэҥҥэ күрэстэһэрбитигэр үгүс күчүмэҕэйдэри үөскэтэр. Онон эрэгийиэҥҥэ сыыппаралааһыны түргэнник киллэрэн бу тэҥэ суох буолууну кылгас кэм иһигэр ордук көдьүүстээхтик туоратар кыахтаахпыт”, – диэн бэлиэтээтэ.
Өрөспүүбүлүкэ баһылыга 2020 сылга Саха сирин олохтооҕун 80 %-на интэриниэккэ холбоммутун туһунан эттэ. Дьиҥинэн, “ити сыал 2024 сылга ситиһиллиэхтээх этэ” диэтэ. Айсен Николаев кэлэр сылларга Хотугу эргимтэҕэ түргэн интэриниэти киллэриигэ уонна сыыппара технологияларын сайыннарыыга улахан болҕомто ууруллаары турарын иһитиннэрдэ.
- 0
- 0
- 0
- 0
- 0
- 0