Ааспыт сууккаҕа уоту умулларыыга 983 киһи уонна 115 тиэхиньикэ үлэлээтэ. Арассыыйа ЫБМ авиацията уонна аэромобильнай бөлөҕө уһулуччу бэлэм туруктаах олороллор. Көтөр ааллары уот нэһилиэнньэлээх пууннарга киирэр куттала үөскээтэҕинэ туттуохтара.
– Суукка устата ойуур баһаардарын иэнэ 101 623,1 гектарынан улаатта. Этиҥнээх былыттар эбии уоту туруордулар уонна саҥа ойуур баһаардара бэлиэтэннилэр. Билиҥҥитэ нэһилиэнньэлээх пууннар уонна экэниэмикэ эбийиэктэрэ уокка былдьанар кутталлара суоһаабат. Үөһээ Дьааҥыга, Эдьигээҥҥэ, Кэбээйигэ, Мииринэйгэ, Томпоҕо уонна Эбээн Бытантайга балаһыанньа уустук. Бу улуустарга 102 ойуур баһаара умайан күлүбүрүүр, – диэн Саха сиринээҕи ЫБМ салаатын начальнига Павел Гарин кэпсээтэ.
Бүгүҥҥү күнү-дьылы кэтээн көрүү билгэтинэн, самыыр түһэрэ күүтүллүбэт. Илинтэн уонна соҕуруу-илинтэн 5-10 м/с түргэннээх тыал үрэр. Онон Нам, Горнай, Уус Алдан, Таатта, Кэбээйи, Томпо нэһилиэнньэлээх пууннара уонна Дьокуускайга буруонан бүрүллүөхтэрэ.
Саха сиринээҕи ЫБМ пресс-сулууспатын матырыйаалынан.
- 0
- 0
- 0
- 0
- 0
- 0