Тыа хаһаайыстыбатын министиэристибэтэ сүүмэрдээһини түмүктээн, быйыл сылгы базатын тутуу сорох ороскуотун толуйуу чэрчитинэн, 18 хаһаайыстыба үстүү мөлүйүөн солкуобай суумалаах субсидияны ылалларын быһаарда. Субсидия ылааччылар кэккэлэригэр түөрт кэпэрэтиип, үс хааччахтаммыт эппиэтинэстээх уопсастыба, тоҕус бааһынай хаһаайыстыба, икки биирдэм предприниматель бааллар.
– Сылгыны үөрдээн иитиигэ 55 мөл. солк. көрүлүннэ. База тутуутугар бэриллэр субсидия куонкуруһугар сүүрбэ улуустан 82 хаһаайыстыба кыттыбытыттан, 18 хаһаайыстыба талылынна. Сүүмэрдээһин субсидиялары тыырыы Бэрээдэгин ирдэбиллэринэн ыытылынна. Субсидияны ылбыттар истэригэр өрөспүүбүлүкэ бастыҥ көрдөрүүлээх племенной хаһаайыстыбалара – Таатта улууһуттан «Победа» ХЭУо, Уус Алдан улууһуттан «Мэкэри» ХЭУо уонна Дьааҥы улууһуттан «Арыылаах» кэпэрэтиип бааллар, – диэтэ миниистири солбуйааччы Николай Афанасьев.
Сылгы базатын тутуутугар субсидия көрүллэрин туһунан сэртипикээт тустаахтарга Ньурбаҕа, кулун тутар 21-22 күннэригэр, өрөспүүбүлүкэтээҕи Сылгыһыт күнүгэр туттарыллыаҕа.
-
0
-
0
-
0
-
0
-
0
-
0
