“Төгүрүк остуол” үлэтигэр Ил Түмэн бэрэссэдээтэлэ Петр Гоголев, кини солбуйааччыта Антонина Григорьева, Бырабыыталыстыба бэрэссэдээтэлин солбуйааччы Михаил Никифоров, дьокутааттар, министиэристибэлэр, биэдэмэстибэлэр салайааччылара, АПК уонна муниципальнай тэриллиилэр бэрэстэбиитэллэрэ кытыннылар.
Туһааннаах кэмитиэт бэрэссэдээтэлэ Андрей Находкин кэпсэтии туох соруктаах тэриллибитин маннык быһаарда: “Билигин бэйэбит тыабыт хаһаайыстыбата оҥорон таһаарар бородууксуйата, сүрүннээн, өрөспүүбүлүкэбит иһигэр батарыллар. Арассыыйа уонна тас дойдулар ырыынактарыгар эмиэ тахсыах тустаахпыт. Бу боппуруос уруккуттан араас таһымҥа дьүүллэһиллэр этэ. Бүгүн ону хос сөргүтэн, олохтоох бородууксуйаны таска батарарга туох харгыстар баалларын ырытыһан-дьүүллэһэн, чопчу быһаарыы ылынарбытын эрэйэр кэм тирээн кэллэ. Билэргит курдук, балаҕан ыйын 29 күнүгэр Ил Дархан ыйааҕынан Экспортнай сэбиэт тэриллибитэ. Онон, бу кэпсэтиини ити сэбиэт үлэтигэр бэлэмнэнии бастакы түһүмэҕинэн ааҕыахха сөп.”
Тыа хаһаайыстыбатын миниистирэ Александр Атласов иһитиннэрбитинэн, былырыын от ыйын 17 күнүгэр Арассыыйа уонна Саха Өрөспүүбүлүкэтин тыатын хаһаайыстыбатын министиэристибэлэрэ Саха сирин АПК оҥорон таһаарар бородууксуйатын таска батарар туһунан сөбүлэһиигэ илии баттаабыттар. Ити 2019 сылга 79 тыһ. дуоллар суумалаах бородууксуйа батарыллыбыт. Ол эбэтэр национальнай бырайыак туруорбут соругуттан 16 эрэ бырыһыана туолбут. Экспорка өрөспүүбүлүкэттэн үс эрэ тэрилтэ үлэлэспит: балыкка -- “Дьокуускайдааҕы балык хампаанньата” ХЭУо, итирдэр-кутурдар утахтарга -- “Саха сирэ” ҮХАПХ, араас ас-үөл бородуукталарыгар – “Тирэх” кэпэрэтиип.
Тэҥнэбилгэ эттэххэ, Татарстан Өрөспүүбүлүкэтэ быйыл 9 ый түмүгүнэн экспорка 227 мөл. дуоллардаах (былырыыҥҥы туһааннаах кэмтэн 76,3 мөл. дуолларынан элбэх) АПК бородууксуйатын батарбыт.
Кэпсэтии түмүгэр эппитин-аспытын омук дьонугар батарарга элбэх харгыстар бааллара көһүннэ. Холобур, аатырар балыкпыт собуота биир контейнер балыгы эрэ таска батарыан сөп. Оттон Кытай сыччах “амсайыыга” (“боруобаҕа”) диэн 20-лии туонналаах 10 контейнеры көрдүүр эбит. Спикер Петр Гоголев хотугу үс улуустан балыгы биэрэргэ бэлэмнэрин үрдүнэн Урбаан, эргиэн уонна туризм министиэристибэтэ бииргэ үлэлэспэккэ олорорун сэмэлээтэ. Оттон аҕыйах хонуктааҕыта “эбээһинэһи толорооччу” дьаралыгыттан босхоломмут бырабыыталыстыба бэрэссэдээтэлин солбуйааччы Михаил Никифоров саныырынан, биһиги өрөспүүбүлүкэбит омук дьонун сир аһынан эрэ “соһутар” кыахтаах.
(Сиһилии “Ил Түмэн” хаһыат сэтинньи 20 күнүнээҕи таһаарыытыгар ааҕыҥ).
-
0
-
0
-
0
-
0
-
0
-
0
