Тыа хаһаайыстыбата

Бас билии көрүҥүттэн тутулуга суох өрөспүүбүлүкэ үрдүнэн 457 тыһыынча туонна оту бэлэмниир сорудах түһэриллибититтэн, 394 тыһыынча туонна чөкөтүллүбүт, ити иһигэр аҕыс улуус былаанын толорбут. 19 улууска мобильнай биригээдэлэр тэриллэннэр, ыраах учаастактарынан, өрүс арыыларыгар киирэн, Амурга кытары тиийэн, барыта холбоон 37,7 тыһыынча туоннаны оттообуттар. Маны таһынан, 23,5 тыһыынча туонна  сиилэс уонна 11,4 тыһыынча туонна сенаж бэлэмнэммит. Баалабайынан 9,9 тыһыынча туонна бурдук хомуллан, былаан 82 %, 58,8 тыһыынча туонна хортуоппуй хомуллан, былаан 83 % итиэннэ 27,5 тыһыынча туонна оҕуруот аһа хомуллан, былаан 92 % толоруллубут.

– Сүөһү аһылыгын бэлэмнээһин бырагырааматынан төрдүс сылын ыһыы сирэ кэҥэтиллэр, быйыл саас 56 тыһыынча гектар бааһынаҕа үлэ ыытыллыбыта, ити иһиттэн тыа хаһаайыстыбатын култууралара 47,9 тыһыынча гектарга ыһыллыбыттара, – диэн иһитиннэрдэ тыа хаһаайыстыбатын миниистирэ Александр Атласов. – Бу бырагырааманан бэһис сылын сыл ахсын өрөспүүбүлүкэ уонна тустаах улуустар бүддьүөттэриттэн 200 мөл. солк. көрүллэр. Ол түмүгэр 12 тыһыынча гектар быраҕыллыбыт бааһына сөргүтүлүннэ, 600 үлэ тиэхиньикэтэ атыылаһылынна, 50 сиилэс траншеята оҥоһулунна, 2,7 тыһыынча километр усталаах бүтэй тутулунна. Быйылгыттан оту хаһаанар сабыылаах кыбыыны оҥоруу саҕаланан, быйыл 9 сабыылаах кыбыы оҥоһулунна.

Салгыы улуустарынан хомуур үлэтин ырытыһыы буолла. Бааһынай хаһаайыстыба баһылыга Александр Фомин (Амма) хортуоппуйу үүннэрии, «Звезда Арктики» хампаанньа генеральнай дириэктэрэ, «Саюри» управляющийа Сергей Балнайтис оҕуруот аһын үүннэрии, «Амматаҕы» ХЭТ салайааччыта Роман Спасьев бурдугу үүннэрии, ТХНЧИ дириэктэрин солбуйааччы, тыа хаһаайыстыбатын наукатын доктора Полина Охлопкова өрөспүүбүлүкэҕэ ыһыллар култууралар сиэмэлэрин туһунан иһитиннэриилэри оҥордулар.

Мунньаҕы түмүктүүрүгэр Андрей Тарасенко судургута суох кэмҥэ үтүө суобастаахтык, таһаарыылаахтык үлэлээбиттэрин иһин, аграрийдарга Бырабыыталыстыба аатыттан махталын биллэрдэ. Ил Дархан Айсен Николаев тыа хаһаайыстыбатын салаатын өйөбүлүн күүһүрдэргэ туруорбут сорудаҕа уталыппакка толорулларын бэлиэтээтэ.

-- Билигин ыһыы сирин кэҥэтэр, үүнүүнү ылыыны үрдэтэр, эдэр исписэлиистэри олохсутан үлэлэтэр туһугар өссө туох дьаһаллар эбии наадаларын туһунан дьүүллэһэ сылдьабыт. Кэлэр 2022 сылга грануламмыт оту бэлэмнээһиҥҥэ ылсыахпыт итиэннэ Нерюнгритааҕы көтөрү иитэр фабрика базатыгар сылга 50 тыһыынча туонна комбикорманы оҥорор кыамталаах комбикорм собуотун бырайыагын бэлэмниэхпит. Маны сэргэ, эһиги ити этэргит курдук, мелиорация ситимин сөргүтүүгэ, сүөһү иитиитигэр уонна сиртэн үүнээйини ылыыга эрэ буолбакка, астыыр-таҥастыыр промышленностка эмиэ үлэ тиэхиньикэтин пааркатын хаҥатыыга болҕомто ууруллуоҕа, – диэтэ мунньаҕы түмүктүүрүгэр Андрей Тарасенко итиэннэ бастыҥ көрдөрүүлээхтэргэ Махтал суруктары туттартаата диэн Ил Дархан уонна Бырабыыталыстыба пресс-сулууспата иһитиннэрэр.