“Идэһэ-2021” дьаарбаҥканы ас-үөл, атыы-тутуу бырааһынньыга диэххэ сөп буолла. Биллэн турар маннык тэрээһиннэргэ тыа хаһаайыстыбатын табаарын оҥорооччулар, тэрээһиннээх хаһайыстыбалар уонна биирдиилээн кэтэх ыаллар сыллааҕы үлэлэрин түмүктэрэ көстөр, икки өттүттэн мэнэйдэһиилээх сэргэх бырааһынньык дьону-сэргэни үөрдэр-көтүтэр.
Татьяна Осипова бүлүүлэргэ эрэлэ улахан
Бу нэдиэлэҕэ улуус баһылыгын бастакы солбуйааччы Иван Евсеев Дьокуускайга сылдьан, тыа хаһаайыстыбатын миниистирин бастакы солбуйааччы Татьяна Осипованы, миниистири солбуйааччы Николай Афанасьевы кытары көрсөн, кэлэр сыллааҕы үлэни былааннаста уонна Бүлүү сиригэр үлэтэ саҕаламмыт биир улахан бырайыакка аналлаах хамыыһыйа мунньаҕын тэриттэрдэ. Санатан эттэххэ, Бүлүү улууһун дьаһалтата Ленскэй оройуон кэнниттэн улуус хааһынатыттан тыа хаһаайыстыбатын салаатын сайыннарыыга кырата суох элбэх үбү көрдө. Ол курдук, быйылгы сылга Бүлүү улууһун дьаһалтата тыа хаһаайыстыбатын салаатын сайыннарыыга 80 000 000 солк. көрбүтэ кэпсэтии сүрүн төрүөтүнэн буолла. Татьяна Осипова кэпсэтиигэ улууспутугар сыһыаннаах араас көрүҥнээх үлэлэри уонна кэлэр өттүгэр ыытыллыахтаах үлэлэри иҥэн-тоҥон ыйыталаста. Кини Бүлүүгэ “Оруктаах” мелиоративнай ситим тутуутугар үөскээбит боппуруостары хонтуруолугар ылбытын, бу үлэ кэлэр өттүгэр харгыстаммакка болдьоммут кэмигэр бүтэригэр үлэлэһэрин эттэ. Бүлүүгэ оҕуруот аһын харайар хранилище тутулларын сөптөөх дьаһаныы быһыытынан чорботон бэлиэтээтэ уонна өҥ буордаах Бүлүү сиригэр хортуоппуйу, моркуобу, сүбүөкүлэни, хаппыыстаны уо.д.а. бүлүүлэр өлгөмнүк үүннэрэллэригэр эрэнэрин биллэрдэ.
“Оруктаах” ситим үлэтэ “бытыктаммат” буолла
Миниистири солбуйааччы Николай Афанасьев Бөтүҥ сиригэр 63 мөл. солк. бырайыактаах үс шлюз-регулятордаах, “Оруктаах” мелиоративнай ситими оҥорууга айылҕа дьайыыларыттан тахсыбыт үлэлэр бырайыакка учуоттамматахтарынан, бырайыагы үбүлээһини тохтотор боппуруос көтөҕүллүбүтүнэн хамыыһыйа мунньаҕын суһаллык ыытары улуус баһылыгын бастакы солбуйааччы Иван Евсеев туруорсубутунан, хамыыһыйа мунньаҕа буолла. Быһаарсыы түмүгүнэн, хамыыһыйа бэдэрээччик бырайыакка салгыы үлэлиирин, үлэни тохтоппокко эрэ киллэһик бырайыагы оҥорон былааннаммыт үлэни 2023 сыллга бүтэрэргэ эттэ. Биир дойдулаахпыт, Николай Степанович Афанасьев, Бүлүүтүн туһугар сүрэҕинэн-быарынан өрүүтүн кыһалларын, көмөлөһөрүн бу да сырыыга көрдөрдө. Хамыыһыйа сөптөөх быһаарыыны ыларыгар, биир санааҕа кэлэригэр кини ылыннарыылаах этиитэ улахан оруолланна, “Оруктаах” ситим үбүлээһинэ быстыбат, үлэтэ салгыы ыытыллар буолла.
16 мөлүйүөн көмө харчы кэлиэ
– Төрөөбүт ынахпыт харчытын, үүппүт харчытын хаһан биэрэллэрэ буолла? -- диэн улуус биир олохтооҕо батсаабынан ыйыытыгар хоруйдууругар көрдөспүппэр, тыа хаһаайыстыбатын департаменын салайааччы Павел Иннокентьев маннык эттэ: – Бу күннэргэ харчы кэлиэҕэ, бэҕэһээҥҥэ диэри улууска төһө туҥуй сүөһү баара чопчуланна. Быһа холоон ааҕыынан, субсидия 450 төбөҕө кэлиэҕэ. Департамент эрдэттэн куонкурустаан, көмө харчы түҥэтиллэр балаһыанньатын бигэргэппитэ, онон 16 мөлүйүөн курдук көмө харчыны түҥэтиэхпит. Үүт харчыта барыта кэлэн, улууска үлэлиир үс соҕотуопсукка («Сыа Бүлүү», «МастаахАгро» уонна «Уйгу» кэпэрэтииптэргэ) барыта тиэрдиллэн турар.
-
0
-
0
-
0
-
0
-
0
-
0
