Ол туһунан “Парламентская газета” суруйар. Бырагыраама сүрүн соругунан тыа сиригэр култуура эйгэтигэр исписиэлистэри тардан үлэлэтии буолар. Ол туһунан Госдума култуураҕа кэмитиэтин бэрэссэдээтэлин солбуйааччыта Ольга Казакова регионнары кытары мунньахха эппит.
“Земскэй култуура үлэһитэ” бырагырааманы “Биир ньыгыл Арассыыйа” баартыйа үлэҕэ киллэрэр. “Земскэй учуутал”, “Земскэй быраас” бырагыраамалар көдьүүстээх түмүктээхтэрин көрөн, култуура үлэһиттэрэ РФ култуураҕа министиэристибэтигэр уонна РФ Бэрэсидьиэнигэр тахсыбыттар. Владимир Путин бу боппуруоһу быһааралларыгар сорудахтаабыт. От ыйын 15 күнүгэр буолбут эрэгийиэннэри кытары видеосибээһинэн мунньахха бырагырааманы оҥоруу боппуруостарын, усулуобуйатын уонна бэрээдэгин ырыппыттар.
Бырагыраамманан тыа сиригэр үлэлии барбыт култуура үлэһиттэригэр биир кэмнээх төлөбүр оҥоһуллара бигэргэнэр. Уһук Илиҥҥэ үлэлиир киһиэхэ 2 мөл. солк көрүллүөҕэ, атын РФ уокуруктарыгар -- 1 мөл. солк. көрүллүөҕэ. Билиҥҥитэ “Земскэй култуура үлэһитэ” бырагыраама 6 сылга диэн киирэр. Бу бырагыраамаҕа тустаах үөрэх кыһатын выпускниктарын уонна уопуттаах култуура үлэһиттэрин тардыахтара. Саамай саастаах кыттааччы 55 саастаах буолуон сөп.
Саха сиригэр тыа сиригэр култуура үлэһиттэрэ тиийбэттэрин кыһалҕата ордук хотугу улуустарга баар суол. Бу кыһалҕаттан таһаарар бырагыраама олоххо 2021 сылга киирэрэ былааннанар.
-
0
-
0
-
0
-
0
-
0
-
0
