Саха тыйаатырын гастролун түмүктүүр тэрээһиҥҥэ Ил Түмэн бастакы вице-спикерэ Александр Жирков кыттыыны ылла.
Александр Николаевич испэктээк кэнниттэн Саха Сириттэн М.С. Щепкин аатынан Үрдүкү театральнай училище (институт) 4 кууруһугар үөрэнэр устудьуоннары кытта көрүстэ. Оҕолор эһиил үөрэхтэрин бүтэрэллэр, үгүстэр төрөөбүт Сахаларын Сиригэр үлэлии кэлэр санаалаахтар.
М.С. Щепкин аатынан Үрдүкү театральнай училище (институт) -- Арассыыйаҕа тыйаатыр артыыстарын бэлэмниир биир кырдьаҕас уонна бөдөҥ үөрэх кыһата. Саха национальнай тыйаатырын сайдыытыгар сүрүн өҥөлөөх үөрэх тэрилтэтэ.
1950 сыллаахха ССРС норуодунай артыыската, уһулуччулаах театральнай педагог В.Н. Пашенная, тыйаатыр артыыһа буолуон баҕалаах саха ыччатын аан бастаан хомуйан, бу училищеҕа саха национальнай устуудьуйатын тэрийбитэ.
Бастакы устуудьуйаҕа саха театральнай искусствотын бүтүн дойду үрдүнэн аатырдыбыт режиссер Федот Потапов, Саха тыйаатырын историятыгар номоххо киирбит чаҕылхай талааннаах артыыстар Анна Кузьмина, Михаил Гоголев, Лазарь Сергучев, Мария Канаева, Ксения Адамова, Татьяна Мыреева, Александра Иванова уонна да атыттар үөрэммиттэрэ.
Билигин бу училищеҕа Саха Сириттэн хайыы-үйэ 6-с театральнай устуудьуйа оҕолоро үөрэнэн бүтэрэллэрэ чугаһаата.
Алтыс устуудьуйаҕа Дьокуускай, Нерюнгри куораттартан, Амма, Үөһээ Бүлүү, Горнай, Кэбээйи, Мэҥэ Хаҥалас, Нам, Ньурба, Өлөөн, Сунтаар, Таатта, Уус Алдан улуустарыттан барыта 20 оҕо кэлэн үөрэнэ сылдьар.
Александр Николаевич бу труппа тэриллиэҕиттэн ыла кинилэри хараҕын далыттан таһаарбат, көмөлөһөр, оҕолору кытта түгэн буллар эрэ көрсүһэр, үөрэхтэрин кэтээн көрөр.
Көрсүһүүгэ Саха тыйаатырын уус-уран салайааччыта, СӨ судаарыстыбаннай сүбэһитэ Андрей Борисов, Саха тыйаатырын дириэктэрэ Петр Макаров, тыйаатыр сүрүн режиссера Руслан Тараховскай, СӨ норуодунай артыыһа Ефим Степанов, СӨ үтүөлээх артыыһа Наталья Степанова, “Саха театрын антологиятын” ааптардарыттан биирдэстэрэ Изольда Бубякина уонна М.С. Щепкин аатынан училищеҕа национальнай устуудьуйа педагога Лена Тимофеева кытыннылар. Андрей Борисов, Ефим Степанов, Петр Макаров, Наталья Степанова бары урукку өттүгэр Щепкин устуудьуйатыгар үөрэммиттэрэ.
Александр Жирков устудьуоннарга Саха тыйаатыра төрүттэниитигэр уонна саха театральнай искусствота сайдыытыгар бастакы көлүөнэ национальнай интеллигенция бэрэстэбиитэллэрин өҥөлөрүн туһунан сиһилии кэпсээтэ, национальнай тыйаатыр суолтатын уонна аналын туһунан санаатын эттэ, оҕолорго Саха тыйаатырын үтүө үгэстэрин бүөбэйдээн илдьэ сылдьалларыгар, харыстыылларыгар баҕатын тириэртэ.
Устудьуоннартан группа ыстаарыстата Ньургун Никитин, итиэннэ Иван Кузьмин, Уйгу Семенов, Александра Михайлова, Сардаана Федотова, Петр Домотов, Мичил Хомподоев уонна да атыттар бэйэлэрин үөрэхтэрин, инники былааннарын туһунан кэпсээтилэр. Көрсүһүү кэмигэр оҕолор Александр Николаевичка болҕомтотун, көмөтүн, үтүө сыһыанын, умнуллубат көрсүһүүлэр иһин махталларын эттилэр.
– Бүгүҥҥү көрсүһүү, мин санаабар, дириҥ суолталаах, – диэтэ көрсүһүү кыттыылааҕа Андрей Борисов, – Өрөспүүбүлүкэ салалтатын өттүттэн тыйаатыр искусствотыгар интэриэс өссө 50-с сылларга үөскээбитэ. Оччолорго баартыйа обкомун сэкирэтээрэ Илья Егорович Винокуров бастакы көлүөнэ щепкиннэри кытта көрсөн, маннык үгэһи олохтообута. Бүгүн ол үтүө үгэспит салҕанар. Манна бүгүн Саха тыйаатырын кэскилэ, Саха Сирин театральнай искусствотын инникитэ кэлэн олорор. Маннык көрсүһүүлэр, сүбэлэр саҥа көлүөнэ эдэр артыыстар уһуйуллан, ситэн-хотон тахсалларыгар олус улахан суолталаахтар.
Бэйэлэрин алгыстарын, баҕа санааларын щепкинецтэргэ Саха тыйаатырын биллиилээх артыыһа Ефим Степанов, дириэктэр Петр Макаров, сүрүн режиссер Руслан Тараховскай уонна да атын бу көрсүһүү кыттыылаахтара анаатылар.
-
0
-
0
-
0
-
0
-
0
-
0
