Хотугу эргимтэ кэтэҕэр Дьааҥы улуһуугар үс ойуур баһаара турбута бэлиэтэммит, уопсай иэнэ — 51 га. Бу кэмҥэ уоту умулларыыга «Авиалесохрана» СБТ 12 үлэһитэ мобилизацияламмыт.
Ойуур баһаара нэһилиэнньэлээх пуунтан 10 уонна 19 км тэйиччи сиргэ турбут, сэлиэнньэҕэ куттал суоһаабат диэн «Авиалесохрана» СБТ пресс-сулууспата суруйар.
«Авиалесохрана» СБТ салайааччыта Владимир Леонов иһитиннэрбитинэн, баһаары утары охсуһар бөлөхтөрү күүһүрдэр үлэ салҕанар. «Билигин өссө 25 үлэһиппит баһаары умуруорууга миэстэтигэр айаннаатылар. Бөлөх өссө 20 уоту утары охсуһааччынан улаатара былааннанар», — диэн Владимир Леонов иһитиннэрэр.
«Дьааҥы улууҺа» МТ баһылыгын э.т. А.С. Васюков дьаһалынан муус устар 30 күнүттэн Дьааҥы улууһугар ураты баһаарынай эрэсиим биллэрилиннэ.
ххх
Биллэрин курдук, Саха Сиригэр ойуур баһаардарын утары дьаһаллары тэрийиигэ сыллата көрүллэр үбүлээһин кээмэйэ 2,7 млрд. солк. харчынан улаатыннарыллыбыта. Докумуоҥҥа этиллэринэн, бу харчы сыллата көрүллэр 1,6 млрд. солк. харчыга эбиллиэхтээх. Ол туһунан Ил Дархан Айсен Николаев 2024 сыл сэтинньитигэр биллэрбитэ..
-Арассыыйа Бэрэсидьиэнэ Владимир Путин Дьокуускайга бэс ыйын 18 күнүгэр (2024 с.)кэлэ сырыттаҕына, киллэрбит этиилэрбит өйөммүттэрин туһунан бигэргэтии бүгүн кэллэ. Үбүлээһин эбиллэн, 2025 сылга ойуур баһаарын утары охсуһарга өрөспүүбүлүкэҕэ федеральнай бүддьүөттэн 4,3 млрд. солк. харчы бэриллэр буолла. 2026-2027 сс. эмиэ итиччэ көрүллүөҕэ, -- диэтэ Айсен Николаев.
Харчы ойуур баһаарын умуруорарга, авиамониториҥҥа, “Авиалесоохрана” судаарыстыба бүддьүөтүн тэрилтэтигэр саҥа салаалары тэрийэргэ уонна билигин баар салаалары күүһүрдэргэ туһаныллыаҕа. Экология, айылҕаны туһаныы уонна ойуур хаһаайыстыбатын министиэристибэтин чахчытынан, саҥа авиасалаалар тэриллиэхтэрэ: 2025 сылга -- Өлүөхүмэ улууһун Саҥыйахтааҕар, Ленскэй Витимигэр, 2026 сылга – Эдьигээҥҥэ, Орто Халымаҕа, 2027 сылга -- Абыйга.
Онон “Авиалесоохрана” СБТ ыстаата 375 ыстаатынан эбиллиэхтээх, ол иһигэр, 316 баһаарынай парашютистар, десантниктар ыстааттара көрүллүөҕэ. Күн бүгүн бу тэрилтэҕэ 740 киһи, ол иһигэр 555 баһаарынай парашютистар, десантниктар үлэлииллэр диэн Ил Түмэн пресс-сулууспата 2024 сыл сэтинньитигэр иһитиннэрбитэ.
Хаартыскаҕа Василий Кононов (Ил Түмэн) түһэриитэ.
-
1
-
0
-
0
-
0
-
0
-
0
