Витим өрүс үөһээ өттүгэр мууһа саҥа көөрөттөр, билигин Бодойбо-Мама учаастагар уу сууккаҕа 3,36 см. эбиллэр, мууһа хамсыыр.
Олоохуна өрүһүгэр көмүөлэ Өлүөхүмэ улууһун сиригэр-уотугар бара турар. Уу таһыма 627 см. (муҥутуура 1650 см.). Көмүөл мууһа Өлүөнэҕэ киириитэ бүгүн-сарсын диэн сабаҕаланар.
Алдаҥҥа муус Уус Маайа, Томпо улуустарынан бара турар, көмүөлүн мууһун уһуна 462 км. Алдан өрүс көмүөлэ Амма төрдүнээҕи учаастагын бүгүн ааһыаҕа диэн бэлиэтэнэр. Өлүөнэҕэ киириитэ ыам ыйын 14 күнүнэн туруоруллубут.
Амма өрүскэ муус Амма, Чурапчы улуустарынан ааһа турар. Таатта улууһун Харбалааҕар уу таһыма 709 см. буолбут (муҥутуура 925 см). Бүгүн-сарсын Таатта сиригэр киирэрэ уонна ыам ыйын 11 күнүгэр Алдаҥҥа тахсара сабаҕаланар.
Бүлүүгэ муус турар, хараарда, ыам ыйын 9-10 күннэригэр Кириэстээх-Сунтаар учаастагар хамсыыра күүтүллэр.
Дьааҥы, Сартаҥ өрүстэргэ уу таһыма үрдүүр, ырбыыланар, Адыыча өрүһүгэр мууһун көтөхпүт, Верхоянскай куорат аннынан көмүөлэ ыам ыйын 16-19 күннэригэр сабаҕаланар.
Атын хоту өрүстэргэ кыһыҥҥы эрэсиим салҕанар. РФ ЫБММ Саха Сиринээҕи управлениетын иһинэн биэдэмистибэлэр икки ардыларынааҕы оперативнай бөлөхтөр Ленскэй, Уус Маайа, Чурапчы уонна Амма улуустарыгар үлэлииллэр. Гидрологическай быһыыны суукканы эргиччи кэтээн көрүү оҥоһуллар, бэйэтэ көтөр ааллар туттуллаллар, Арассыыйа ЫБММ сөмөлүөттэрэ бэлэмэҥэ тураллар диэн Саха Сирирээҕи управление пресс-сулууспатын салайааччыта Ксения Рахматулина иһитиннэрэр.
Хаартыска Арассыыйа ЫБММ Саха Сиринээҕи управлениетын пресс-сулууспата
-
2
-
0
-
0
-
0
-
0
-
0
