Бырайыак салайааччыта, “АРКТИК КАПИТАЛ” сир баайын хостуур тэрилтэ пресс-сулууспатын салайааччыта Сардана Сивцева биһиэхэ маннык сырдатта:
-- Бу бэртээхэй бырайыагы Николай Апросимов таҥан оҥордо. Чопчулаан эттэххэ, кини “АРКТИК КАПИТАЛ” сакааһынан эбэҥкилии “AYANA” лингвистическай платформаны оҥорбута, билигин саха тылыгар "Барҕарыы” национальнай пуонда нөҥүө Сунтаар улууһуттан Ил Тумэн дьокутаата Афанасий Постников салалтатынан “АйКУО” диэн тылдьыкка үлэлии сылдьар. Оттон бу Сергей Зверевтыын алтыһыы бырайыага сүрүннээн оҕолорго ананар, кинилэр улуустарын улуу дьонун, устуоруйатын сэргииллэригэр, сахалыы саҥаралларыгар, төрүт култуураларын баһылыырга баҕалаах буолалларыгар, сайдалларыгар төһүү буолуоҕа. Ыһыах ньиргийэ да турдар биһиги бырайыакпытын сүрэхтиирбитигэр элбэх киһи, ыалдьыт сырытта, Ил Түмэн дьокутааттара, бырабыыталыстыба салайааччылара эмиэ. Онно күүтүллүбэтэх биир эриэккэс түгэни бэлиэтээтим. Биһиэхэ Сергей Зверев уола Төгүл Сергеевич кэргэнинээн Анна Николаевналыын ыалдьыттаатылар. Бу манна виртуальнай реальность “тилиннэрэн” уола аҕатынаан көрүстэ. Ону көрөр олус долгутуулаах этэ. 2020 сыллаахха биһиги хампаанньабыт Сунтаарга Сергей Зверев аатынан Норуот айымньытын дьиэтин тутан киллэрбитэ. Бу сырыыга Матвей Николаевич бу тэрилтэҕэ оҥорбут бырайыакпытын уонна VR набордарын бэлэхтээтэ. Онон аны Сунтаарга – Олонхо дойдутугар, төрүт Ыһыах ыытыллар сиригэр култуура сайдыытыгар аныгы технологиялар күүс-көмө буолуохтара.
Дьэ ити курдук, быйылгы Сергей Зверевка анаммыт ыһыах үгүс үтүө тэрээһиннэриттэн биир сонуннара бу искусственнай интеллект көмөтүнэн оҥоһуллубут бырайыак буолла. Инникитин Сунтаардааҕы норуот айымньытын киинэ маны сайыннарыа, өссө байытыа дии саныыбыт.
Галина БОЧКАРЕВА.
Сардаана СИВЦЕВА хаартыскаҕа түһэриилэрэ.
-
3
-
0
-
0
-
0
-
0
-
0
