Мунньахха Дьокуускай куорат баһылыга Е.Н. Григорьев дьаһалынан тэриллибит гуманитарнай көмө киинин үлэтин тэрийии туһунан кэпсэттилэр. Бу киин салайааччытынан Өрөспүүбүлүкэ улуустарын сэбиэтин бэрэссэдээтэлин солбуйааччы Надежда Петровна Федорова ананна. Итиэннэ Өймөкөөн улууһун түмсүүтүн бэрэссэдээтэлэ Анна Николаевна Атастырова.
Сүбэ мунньах түмүгүнэн харчынан көмөнү хомуйууну саҕалаатылар. Бу куйаар-кодунан ыытыаххытын сөп. Ону Сэбиэт улуустар пуондаларыгар тиксэрэр.
Итиэннэ хомуллубут көмөнү сааһылыырга, таһарга, сүөкүүргэ волонтердар наадалар. Киин штаб – ДОСААФ гарааһа. Аадырыһа: Бестужев-Марлинскай уул. 5.
Ил Дархан Айсен Николаев ыксаллаах быһыыны-майгыны сэрэтэр, туоратар уонна баһаартан куттал суох буолуутун хааччыйар хамыыһыйа мунньаҕар: «Абый, Муома уонна Өймөкөөн улуустарыгар нэһилиэнньэлээх пууннар ууттан босхолоннулар. Ол эрээри уу таһыма халбаҥныан сөп. Биһиги чөлүгэр түһэрэр үлэлэри ыыта охсуохпутун наада. Бастакынан турар сорук — эмсэҕэлээбиттэргэ үп өттүнэн көмөнү ыытыы. Сайабылыанньалар номнуо киирдилэр. Онон бу үлэни уһаппакка-кэҥэппэккэ саҕалыахха. Олохтоох бэйэни салайыныы уорганнара уонна толорор былаас хас биирдии эбийиэккэ тахсыбыт хоромньуну ааҕан, чөлүгэр түһэрии үлэтин күүскэ тэрийиэхтээх. Дьон ыытар көмөтүн улуус баһылыктара хонтуруоллуохтарын наада. Барыта наадыйар дьоҥҥо тиийэрин курдук», — диэн эттэ.
Онон бука бары күүс-көмө буолуоххайыҥ! Бастакы уочарат бородуукта уонна тутуу матырыйаала. Өймөкөөн улууһа ньирэйдэргэ бороһуок үүт наадатын эттэ. Ийэлэрэ ууга былдьаммыттар. Оҕо бороһуок үүтэ болдьоҕо ааспыт да буоллаҕына, ол барсар.
Норуот күүһэ - көмүөл күүһэ.
-
0
-
0
-
0
-
0
-
0
-
0
