Все новости

Быйылгы үбүлүөйдээх пуорумҥа 100 дьыалабыай тэрээһин чэрчитинэн сиэссийэлэр, төгүрүк остуоллар уонна бизнес-кэпсэтиилэр бара тураллар. Пуорум бырагыраамата 7 сүрүн блогунан тыырыллан турар: Уһук Илин – олорорго уонна сайдарга анаммыт сир; Үүнүү тирэхтэрэ – инбэстииссийэлэр, инновациялар, интеграциялар; Аһаҕас буолуу уонна барыстаах бииргэ үлэлээһин – тулааһыннаах тутул; Технологиялар: теорияттан көдьүүстээх экэниэмикэҕэ; Куораттар – киһиэхэ анаан; Үүнүү артерията: логистика экэниэмикэни хайдах уларытарын туһунан; Бизнес уонна судаарыыстыба бииргэлэһиилэрэ: улахан хомуур. Пуорум кэмигэр үгэс курдук атын дойдулартан: Кытай, Ииндийэ, Таиланд, Мьянма, Лаос, Монгуолуйа уонна АСЕАН   предпринимателлэрин кытта тус көрсүһүүлэр, кэпсэтиилэр бэрт сэргэхтик, тэтимнээхтик баран иһэллэр.    

Балаҕан ыйын 4 күнүгэр Арассыыйа бэрэсидьиэнэ Владимир Путин Владивостокка Уһук Илин сайдыытын түмүктэрин кытта билистэ уонна Саха сирэ  Хабаровскай кыраайы кытта ситимнэһэр  саҥа эбийиэктэрин, ол иһигэр Чуумпу акыйаан тимир суолун арыллыытыгар  куйаар ситиминэн кытынна.

Бу чааһынай тимир суол Саха Сирэ уонна Хабаровскай кыраай экэнэмиичэскэй сайдыыларыгар туһаайыллыбыт саҥа кыаҕы арыйыаҕа.

Ил Дархан Айсен Николаев Чуумпу акыйаан тимир суолун үлэҕэ киллэрии бүтүн дойдуга улахан суолталаах түгэн буоларын эттэ. Ол чох бырамыысыланнаһыгар эрэ буолбакка, Уһук Илин экэниэмикэтигэр, ол иһигэр Саха Өрөспүүбүлүкэтигэр, күүстээх хамсааһыны таһаарыаҕын  бэлиэтээтэ. “Саха сирэ дойду үрдүнэн чоҕу хостооһуҥҥа иккис миэстэҕэ таҕыста. Сэттэ сыллааҕыта, 2018 сыллаахха 18 мөлүйүөн туонна чох хостонор эбит буоллаҕына, ааспыт сыл бүтүүтүгэр чоҕу хостооһун 49,4 мөлүйүөн туоннаҕа тэҥнэстэ. Быйыл бу көрдөрүү 52 мөлүйүөн туоннаҕа тиийэрэ былааннанар. Быйыл төрүттэммитэ 50 сылын туолар кыһыл көмүс үбүлүөйүн бэлиэтиир  Саха сирин соҕуруу куората Нерюнгри устуоруйатыгар саҥа сүүрээн саҕылынна. Өрөспүүбүлүкэбит сир аннынааҕы баайа биһиги улуу судаарыстыбабыт хаһаайыстыбаннай кыаҕын сайдыытыгар  сулууспалыырынан киэн туттабыт», — диэн бэлиэтээтэ Ил Дархан 

Ону тэҥэ, эмиэ бу күн “Губернатордар кулууптара” сиэссийэҕэ Уһук Илин эрэгийиэннэригэр салайар быраактыкаҕа социальнай архитектура көрүүлэрин уонна ньымаларын киллэрии туһунан дьүүллэстилэр, ону тэҥэ бу эҥээр эрэгийиэннэргэ көдьүүстээх социальнай бырайыактары үөрэттилэр. Оттон бүтэһик күн, балаҕан ыйын 6-гар эдэр предринимателлэргэ туһунан улахан тэрээһин бу пуорум түһүлгэтин түмүктүөҕэ.

Саха Сирэ Владивостокка Ил Дархан Айсен Николаев салалтатынан улахан дэлэгээссийэнэн тиийэн, туспа экспозиция – түһүлгэ тэринэн, бэрт киэҥ, улахан кэпсэтиилэри ыыта сылдьаллар, сөбүлэһиилэри, дуогабардары түһэрсэллэр.  

Ол курдук, балаҕан ыйын 3 күнүгэр, онус Илиҥҥи экэнэмиичэскэй пуорум бастакы күнүгэр, СӨ Ил Дархана Айсен Николаев «Креативнай экэниэмикэ: Уһук Илин сайдыытын саҥа модела» диэн сессияҕа кыттан, эрэгийиэҥҥэ айар индустрия сайдыытын түмүктэрин уонна кэскилин туһунан кэпсээтэ. Салгыы Айсен Николаев уонна «РВБ» ХЭУ генеральнай дириэктэрэ Татьяна Ким өрөспүүбүлүкэҕэ ыскылаат комплексын тутуу инвестиционнай бырайыагын олоххо киллэрии боппуруостарын дьүүллэстилэр. Бу кэпсэтии түмүгүнэн, «РВБ» хампаанньа Дьокуускай куоракка 30 тыһыынча кв. миэтэрэттэн тахса иэннээх ыскылаат комплексын тутар былааннаах.

Салгыы «СОГАЗ» АУ эрэгийиэннээҕи сайдыыга дириэктэрэ Алексей Абрамов уонна СӨ Бырабыыталыстыбатын Бэрэссэдээтэлэ Кирилл Бычков бииргэ үлэлиир туһунан сөбүлэҥҥэ илии баттастылар.

Өрүттэр страховой өҥөлөр ордук судургутук ылыллыахтаахтарын хааччыйарга уонна нэһилиэнньэ страховой үөрэхтээх буолуутун үрдэтэргэ бииргэ үлэлиэхтэрэ. Эрэгийиэн олохтоохторун уонна тэрилтэлэрин интэриэстэригэр, ону таһынан Саха Өрөспүүбүлүкэтин биир кэлим социальнай-экэнэмиичэскэй сайдыытын туһугар страхование бастакы суолталаах көрүҥнэрин эйгэтигэр бииргэ үлэлиир туһунан кэпсэтии ситиһилиннэ.

Пуорум кэмигэр СӨ Бырабыыталыстыбата уонна дойдуга Кытай урбаанньыттарын сойууһа бииргэ үлэлиир туһунан сөбүлэҥ түһэристилэр. Докумуоҥҥа Ил Дархан Айсен Николаев уонна Сойуус бэрэссэдээтэлэ Чжоу Лицюнь илии баттаатылар. Өрүттэр араас эйгэлэргэ бииргэ оҥорор бырайыактары тарҕатар уонна олоххо киллэрэр, ону таһынан дьоҕус уонна орто биисинэһи өйүүргэ эбии усулуобуйалары тэрийэр сыалтан, Саха сирин сиригэр-уотугар атыы-эргиэн-экэнэмиичэскэй уонна инвестиционнай бииргэ үлэлээһини сайыннарар былааннаахтар.

Саха Сирэ уонна «ОКТО» бөлөх генеральнай дириэктэрэ Александр Тузенко «ОКТО Золото» АУ-ны кытта социальнай-экэнэмиичэскэй сайдыыга бииргэ үлэлэһэр туһунан сөбүлэҥҥэ илии баттастылар.

«ОКТО» бөлөх бас билээччитэ Дмитрий Толоконниковтыын уонна генеральнай дириэктэр Александр Тузенколыын көрсүһүүгэ сүрүн тиэмэлэринэн Саха сирин экэниэмикэтин сайыннарар уонна инвестицияны тардар бырайыактар, ону таһынан социальнай, үөрэх, доруобуйа харыстабылын уонна экология эйгэтигэр бииргэ олоххо киллэрэр бырагыраамалар буоллулар.

Биир ураты көрсүһүүнэн «Экстра Синема» хампаанньа генеральнай дириэктэрэ Петр Чиряев Непал Инвестиционнай сэбиэтин сүрүн толорооччу дириэктэрэ Сушил Гьевалины уонна Непал нерезиденнэрин ассоциациятын бэрэсидьиэнэ доктор Бадри К.С.-ны кытта кэпсэтиитэ буолла.

Бу көрсүһүүгэ Непалга киинэнэн хааччыйыы кыһалҕаларын уонна дойду национальнай кинематографиятын сайыннарыы боппуруостарын дьүүллэстилэр. Непалга, Соҕуруу Азия үгүс дойдуларын курдук, киинэ тыйаатырдара Катманду, Покхара уонна Непалгандж курдук бөдөҥ куораттарга уонна туристическай кииннэргэ бааллар. Оттон Непал нэһилиэнньэтин баһыйар өттө киинэ көрөр кыаҕа суох тыа сиригэр олорор. Ол эрээри, дойдуга сылга 50-ча киинэ, ол иһигэр непал тылынан уонна олохтоох майтхили, дотели, хинди уо.д.а. тылларынан уһуллар. Непал бэрэстэбиитэллэрин «Экстра Синема» ыраах сытар сирдэргэ киинэ көрдөрүүтүн түргэнник тэрийэргэ кыах биэрэр технологическай быһаарыыта интэриэһиргэттэ. Сушил Гьевали бэлиэтээбитинэн, хампаанньа соруга дойду бырабыыталыстыбатын гуманитарнай сыалларыгар сөп түбэһэр.

Бу курдук салгыы өссө да атын дойдулары, Арассыыйа бөдөҥ хампаанньаларын кытта бииргэ үлэлээһин туһунан сөбүлэһиилэр бара тураллар.

Хаартыскалар sakhagov.ru  саайтан