Быйылгы айар дьыл арыллыыта Саха тыйаатырын төрүстэспит, саха ускуустубатын сайдыытыгар уһулуччу суолталаах диэйэтэл, ССРС, Саха АССР норуодунай артыыһа, педагог, режиссер Василий Васильевич Местников айар үлэтигэр ананна. “Ити саамай сөптөөх быһаарыы. Василий Местников саха ускуустубатын сайдыытыгар уһулуччу суолталаах киһи”, – диэн Ил Түмэн бэрээссэдээтэлин бастакы солбуйааччы, саха тылын, култууратын, ускуустубатын сайыннарыыга, сүдү кылааты киллэрбит үтүө дьоммут аатын үйэтитиигэ сүҥкэн үлэни ыытар норуот дьокутаата Александр Жирков тыл эттэ. Александр Николаевич Саха тыйаатыра төрүттэммит кэмин 1906 сыл тохсунньу 3 күнүгэр ааҕарга диэн бүтэһиктээх быһаарыы ылыллыбытын, Ил Дархан дьаһал биэрбитин үөрүүлээх быһыыга-майгыга иһитиннэрдэ. “Саха тыйаатыра Арассыыйа үрдүнэн 10 саамай кырдьаҕас тыйаатырдар кэккэтигэр киирдэ. Онтон национальнай тыйаатырдарга – бастакы!” – диэн этээтин кытта ытыс тыаһа өрө хабылынна.
Бу күн Василий Васильевич Местников олоҕун, айбыт-туппут үлэтин кэрэһэлиир кинигэ сүрэхтэннэ, быыстапка турда. Саха академическай тыйаатыра, Олоҥхо тыйаатыра, Опера уонна балет тыйаатыра “Туйаарыма Куо”, “Олох оонньуура”, “Наара суох”, “Хаарыан Хампа кытылым” испэктээктэри уонна “Ньургун Боотуртан” быһа тардыыны көрдөрдүлэр. Саха бастакы режиссёрдарыттан биирдэстэрэ Василий Местников олоҕуттан бэлиэ кэрчиктэри арыйдылар. “Саха норуотун ускуустубата сайдарын туһугар күүспүн харыстыам суоҕа. Биир умнуллубат улахан оҥкулу оҥордум, ону умнуохтара суоҕа диэн эрэнэбин” диэн Василий Местников этиитинэн түмүктээтилэр.
Истиҥ эйгэлээх дьоро киэһэ буолла. Саха тыйаатырын 120-с айар дьыла саҕаламмытынан!
Диана КЛЕПАНДИНА.
Сиһилии суруйууну "Сахапарламент" хаһыат 39 №-гэр ааҕаарыҥ.
-
1
-
0
-
0
-
0
-
0
-
0
