Дойду Баһылыга Владимир Путин 2016 с. от ыйын 21 күнүгэр таһаарбыт 350 №-дээх «Тыа хаһаайыстыбатын сайыннарыыга судаарыстыба билим-тиэхиньиичэскэй бэлиитикэтин олоххо киллэрии дьаһалларын туһунан» Ыйааҕын чэрчитинэн, дойдуга ас-үөл өттүнэн куттал суох буолуутун хааччыйарга саҥа технологиялары, силиэксийэни, ыһыы сиэмэтин элбэтэн тарҕатыыны сайыннарыыга федеральнай билим-тиэхиньиичэскэй бырагыраама үлэлиир.
Дьэ, бу соругу толорууга саха учуонайдара айымньылаахтык үлэлииллэр. Кинилэр айан таһаарбыт технологияларын олохтоох хаһаайыстыбалар туһаналлар, үлэлэрин көрдөрүүтүн үрдэтэллэр. Холобур, сүөһү-сылгы иитэр хаһаайыстыбалар аһылык эбииликтэрин уонна эмтиир-чэбдигирдэр препарааттары мэлдьи тутталлар. Оттон сиэмэ хаһаайыстыбалара ирбэт тоҥноох хотугу дойду тыйыс усулуобуйатыгар сөп түбэһиннэрэн айыллыбыт, оройуоннаммыт култууралар сиэмэлэрин элбэтэн тарҕатар буоланнар, сааскы ыһыыга бурдук сиэмэтинэн толору хааччыналлар. Арай, элбэх сыллаах от сорох суордун сиэмэтин өрөспүүбүлүкэ таһыттан атыылаһаллар.
Билимҥэ тирэҕинэн
Үбүлүөйдээх дьаһал бырагырааматынан, алтынньы 8-9 күннэригэр Арассыыйа Билимҥэ акадьыамыйатын Сибиирдээҕи салаатын Саха Сиринээҕи киинигэр Бүтүн Арассыыйатааҕы билим-быраактыка кэмпириэнсийэтэ буолан ааста.
Кэмпириэнсийэ пленарнай мунньаҕа алтынньы 8 күнүгэр «Арассыыйа Федерациятын Уһук Хотугу түбэтигэр уонна онно тэҥнэммит сирдэргэ агроинновация: билим уонна быраактыка» диэн тиэмэҕэ ананна. М.Г. Сафронов аатынан Тыа хаһаайыстыбатын билим-чинчийэр үнүстүүтүн дириэктэрэ Михаил Черосов үнүстүүт тэриллибит устуоруйатын, үлэтин хайысхаларын туһунан сырдатта. Тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова үнүстүүт чинчийиилэрин көдьүүһүгэр ырытыы оҥордо.
– Биһиги өрөспүүбүлүкэбитигэр билимҥэ тирэҕирииттэн үлэ көдьүүһүн үрдэтии итиэннэ олох-дьаһах хаачыстыбата тутулуктанар. Министиэристибэ Тыа хаһаайыстыбатын билим-чинчийэр үнүстүүтүн кытары ыкса үлэлиир, олохтоох учуонайдар айымньылаах үлэлэрин түмүгэр бэйэбит оҥорон таһаарар бородууксуйабытынан хаачыллыыбыт бигэ туруктаах. Тыа хаһаайыстыбатын сайыннарыы өрөспүүбүлүкэтээҕи билим-тиэхиньиичэскэй бырагыраамата тустаах федеральнай бырагыраама сорҕотун быһыытынан, билим саҥа ньымаларын, арыйыыларын олоххо киллэрэн, аһылык өттүнэн тутулуга суох буолууну хааччыйар, – диэтэ миниистири солбуйааччы.
ТХБЧҮ билимҥэ сүрүн үлэһитэ Михаил Неустроев өрөспүүбүлүкэҕэ бэтэринээрийэ билимин сайдыытын туһунан кэпсээтэ, М.К. Аммосов аатынан ХИФУ дассыана Моисей Захаров тыа хаһаайыстыбатын күннээҕи үлэтигэр-хамнаһыгар сыыппара технологиятын туһаныы туругун иһитиннэрдэ. Ыраах эрэгийиэннэртэн билим үлэһиттэрэ онлайн киэбинэн кытыннылар. Ол курдук, Бүтүн Арассыыйатааҕы генетика өрөсүүрсэтин үнүстүүтүн үлэһитэ Галина Таловина Саха Сиригэр үүнэр айылҕа отун-маһын чинчийэр эспэдииссийэ түмүгүн иһитиннэрдэ. Фрунзе куораттан Биотехнология үнүстүүтүн дириэктэрэ Асанкадыр Жунушов Кыргызтаан өрөспүүбүлүкэтигэр Сибиир дьааспатын сэрэтиигэ ыытыллар үлэни сырдатта.
Күнүстэн киэһэ үлэ сиэксийэлэринэн ыытылынна.
Хаартыска: Надежда Никитина итиэннэ Тыа хаһаайыстыбатын уонна ас-үөл бэлиитикэтин МАХ ханаала.
-
0
-
0
-
0
-
0
-
0
-
0
