Хара маҥнайгыттан кимиилээхтик, тахсыылаахтык үлэлээн, бу биэс сыл тухары ситиһии, кыайыы син да балачча баарыттан биһиги саҕалаабыт дьон сэмэйдик үөрэбит.
Биэс сылбытын көрсө, Арассыыйа худуоһунньуктарын сойууһун икки чилиэнэ баар буолла, уонунан ааҕыллар быыстапка туруорулунна. Аҥаардас “Үргэл” арт-галереяҕа иккитэ, “Строительнай” ырыынак кыһыл саалатыгар, “Симэх” галереяҕа, о.д.а, куонкурустарга, көрүүлэргэ кыттан, Хатаспыт аатын доргуччу ааттаттыбыт. Ефремовтар дьиэ кэргэн альбом таһаардылар.
Бүгүҥҥү кэпсээммит Лазарева Октябрина Афанасьевна туһунан буолуо.
Кини бу түмсүү саамай маҥнайгы чилиэннэриттэн биирдэстэрэ. Өр сыл сүрэҕэр-дууһатыгар иитийэхтии сылдьыбыт баҕа санаатын хайдах саҕалыыбын дии саныы сырыттаҕына, оруобуна баҕалаахтары ыҥырар биллэриини көрөн кэлбит.
Ис-иһиттэн, хайдах эрэ, иһиллии сылдьардыы уу чуумпу, налыы-намыын туруктаах, нарын-намчы бэйэлээх, кэрэ сэбэрэлээх Октябрина Афанасьевна кэлэригэр чуолкай ылыммыт былааннаах, барыллардаах этэ. Сүрдээх болҕомтолоох, кыраҕы харахтаах, бэйэтэ туспа көрүүлээх буолан, дьоһун үлэлэри суруйда. Кинини атыттартан уратыта -- наһаа ымпыктаан-чымпыктаан, киистэтинэн кыраасканы хас биирдии ууруутугар тиийэ толкуйдаан үлэлиир. Бэрт сотору дьиҥ бэйэтин толкуйунан таһаарбыт хартыыналарын суруйан барбыта. Уруһуйу таһынан баайыынан, тигиинэн дьарыктанар, былырыыҥҥаттан “Хатастыына” түмсүүгэ сылдьар дьүөгэлэрин уруһуйга уһуйар.
Бүгүн бэс ыйын 7 күнүгэр үөрүүлээх сурах кэллэ. “Наивнай искусство” диэн аатырар дууһа баҕатынан, тулалыыр эйгэҕин хайдах ылынаргынан хартыыналары суруйар хайысхаҕа Чурапчы улууһун Хадаар нэһилиэгэр икки сылга биирдэ ыытыллар куонкуруска муҥутуур кыайыылааҕынан -- Кылаан бириис хаһаайкатынан -- Лазарева Октябрина Афанасьевна буолбут! Ол туһунан куонкурус аатын сүгэр Давыдова Мотрена Прокопьевна төрөппүт кыыһа Зинаида Николаевна Теренкова маннык диэн биллэрдэ:
- “Кэрэни кэрэхсээ» диэн ийэбит, эбэбит Мотрена Прокопьевна Давыдова аатынан икки сыл буола-буола ыытыллар “наивнай” уруһуй куонкуруһун түмүгэ таҕыста.
Гран-при -- Лазерева Октябрина Афанасьевна, Хатас, "Ийэм лэппиэскэтэ" (масло, холст 40*50).
I миэстэ Филиппова Ирина Николаевна, "Эргиллэн кэлбитэ" (акрил, холст. 2022 с.).
II миэстэ -- Самсонова Марфа Михайловна, Хаҥалас улууһа, Покровскай куорат, " Алаас ахтылҕана" (масло, картон 30*40).
III миэстэ -- Иванова Анна Николаевна, Чурапчы улууһа, Хоптоҕо нэһ., "Дьыл кэмнэрэ" (акрил, картон 2022с.).
Манна даҕатан эттэххэ бу күрэс норуот талааннаахтарын, любитель-худуоһунньуктары киэҥ эйгэҕэ таһаарарга сүрдээх киэҥник биллэр, соҕотох кэриэтэ тэрээһин буолар.
“Наивнай искусство” саамай сыаналанар өрүтэ -- хартыыналар ааптардара бэйэлэрин көрүүлэрин, олоҕу ылыныыларын, буола турар түгэҥҥэ сыһыаннарын ханнык да хааччахха (быраабылаҕа) хаайбакка, сүрэх, дууһа этэринэн таһаараллара буолар. Инньэ гынан ураты майгылаах, быһыылаах хартыына тахсар. Анал үөрэхтээх, уһун сылларга үлэлээбит ааттаах-суоллаах худуоһунньуктар билинэллэринэн, араас дьикти өҥ-дьүһүн дьүөрэлэһиитэ баар буолар эбит. Манна Өрөспүүбүлүкэтээҕи норуот айымньытын дьиэтин оруола олус улахан, чуолаан бу тэрилтэ биир тутаах үлэһитэ Слепцова Пелагея Николаевнаны ааттыаҕы баҕарыллар. Матрена Прокопьевна аатын үйэтитиигэ, кини үлэлэрин үрдүк сыаналааһыҥҥа күүскэ үлэлэспитин түмүгэр норуот талааннаахтара үрдүк үктэлгэ тахсыбыттара.
Түгэнинэн туһанан Мотрена Прокопьевна оҕолоругар, көлүөнэ ситимэ дьонноругар барҕа махталбытын тиэрдиэхпит этэ. Бу маннык ыаллар баалларын тухары талааннаах дьон-сэргэ ааттанар, сайдар-үүнэр аартыктара арыллыа, аһыллыа турдаҕа.
Онтон биһиги, хатастар, Октябрина Афанасьевнабытын ис сүрэхпититтэн эҕэрдэлиибит уонна салгыы ситиһииҥ ситимэ быстыбатын, кыайыыҥ кыаххын үрдэттин, бэйэҕэр эрэлгин улаатыннардын диэн алгыыбыт уонна эйигинэн киэн туттарбытын, убаастыырбытын этэбит.
Н. Руфова Хатас. Бэс ыйа.2022 сыл.
-
6
-
0
-
0
-
0
-
0
-
0