Общество

Бу кылгас да кэм буоллар, сэбиэт үгүс өрүттээх үлэни ыытан кэллэ. Саамай сүрүнэ -- сэбиэт дьону биир санааҕа түмүүгэ үлэлэһэр соруктаах.

Улуустар землячестволара дьоннорун үөрүүлээх да, хомолтолоох да түгэннэригэр бииргэ буолаллар. Былырыын өрөспүүбүлүкэ бары улуустарыгар ойуур баһаардара тураннар, улуус землячестволара баһаары утары охсуһар уопсастыбаннай добровольческай ыстаап ыытар үлэтигэр сүрүн тэрийээччилэринэн буолбуттара.

Билигин Украинаҕа анал байыаннай дьайыыга быстах мобилизация ыытылларынан, улуус землячестволара Дьокуускайга кэлэр биир дойдулаахтарын көрсөллөр, атаараллар уонна туох кыалларынан көмөлөһө сатыыллар. Холобур, куоракка олорор Горнай улууһун эбэлэрэ, ийэлэрэ (землячество салайааччыта, сэбиэт салайааччытын солбуйааччы Н.П. Федорова) аптечка хааларын тигэргэ ылыстылар.

Балаҕан ыйын 27 күнүгэр СӨ Уопсастыбаннай палаатата улуустар землячестволарын сэбиэтин кытары мунньах ыыппыта. Бу мунньахха Уопсастыбаннай палаата быстах мобилизацияҕа хабыллан барар уолаттарбытыгар көмөлөһөр Координационнай киин үлэтин кытта улуустар землячестволара ыыта сылдьар үлэлэрин хайдах гынан биир сүрүҥҥэ киллэрии чуолкайдаммыта.

 Киин сүнньүнэн 3 хайысханан үлэни ыытар:

1. Баһыылкалары тутар уонна обработкалыыр сир (улуустарга уонна Дьокуускайга Орджоникидзе уул. 10, 2 этээс).

2. Сайабылыанньалары хомуйуу, юристар көмөлөрө: Курашов уул. 24, 4 этээс, 401 хос, электроннай аадырыс: Адрес электронной почты защищен от спам-ботов. Для просмотра адреса в вашем браузере должен быть включен Javascript., төлөпүөн нүөмэрэ 507363.

 3. Психологическай көмө: Курашов уул. 36, төл.: 319109, 88001003550, 88002000122. Мобилизацияламмыт саллаат бааһырдаҕына, бойобуой дьайыылар бэтэрээннэрин ассоциациятыгар биллэрэргитигэр көрдөһөбүт -- 89245998989.

Бу хайысхаларынан ыытыллар үлэлэргэ улуустар землячестволара бэйэлэрин кыахтарынан көмөлөһө сатыыллар. Бу мунньахха улуу убайбыт Алампа Софроновтан хаан тамайыылаах саллааттар ийэлэрин кэмитиэтин салайааччыта Мария Емельянова военкоматтары кытары бронь боппуруоһугар үлэлэһэр тэрилтэлэр хамнастаах үлэһиттэрэ мөлтөхтүк үлэлииллэрин бэлиэтээн эттэ. Онно ОДьКХ үлэһиттэрин, табаһыттары чорботон эппитэ. Мария Егоровна күн аайы 260 тахса саллаат, саллааттар төрөппүттэрэ киниэхэ төлөпүөнүнэн эрийэн, көмө көрдүүллэрин туһунан кэпсээтэ.

Аны социальнай ситимнэргэ сымыйа сурахтары анаан тарҕатар буоллулар. Улуус землячестволара өрөспүүбүлүкэни барытын хабар буоланнар, сымыйа сурахтарга быһаарыы биэрэ сатыыллар.

Бары билэҕит, Саха Сириттэн сүүстэн тахса киһилээх добровольческай этэрээт Украинаҕа барбытын. Этэрээт хамандыырынан биһиги сэбиэппит актыыбынай чилиэнэ Александр Колесов ананан барбыта. Кини итии точкаҕа сэриилэһэн, бойобуой наҕараадалары ылбыт буойун. Этэрээти Ил Дархан Айсен Сергеевич Николаев атаарбыта. Аҕыйах хонуктааҕыта “бу этэрээттэн элбэх киһи дезертиирдээтэ” диэн сурах тарҕаммыта. Бу сураҕы сымыйа диэн Александр бэйэтэ быһаарыы суруйан ыыппыта. Биһиги уолаттарбыт хорсуннук сэриилэһэ сылдьаллар. Александр соторутааҕыта кырыктаах кыргыһыыттан, өлөр өлүү айаҕыттан биир дойдулаахтарын быһаан таһаарда. Кини Украинаҕа уопсайа 3 төгүл хорсун быһыыны оҥордо.

Бу этэрээт барарыгар, “уолаттар дьиэ кэргэн проблемаларыттан, оһох оттуохтарын сүрэҕэлдьээн куоттулар” эҥин диэн күлүү гынар сурахтар тарҕаммыттара. Онно быһаарыы курдук, Саха Сирин ВДВ сулууспалаабыт краповай береттээх уолаттарын уопсастыбаннай тэрилтэлэрин салайааччыта Олег Омуоһап маннык эттэ: “Биһиги уолаттарбыт мээнэ уулуссаттан хомуллубатахтара, анал бэлэмнэниини ааспыттара, онон өссө даҕаны баалларын биллэриэхтэрэ, Саха Сирин ааттатыахтара”, -- диэн эрэлин биллэрэр.

  Кини итии точкаҕа сэриилэспит, улаханнык бааһыран, протеһынан хаамар да буоллар, буойун быһыытынан бэйэтин уопутуттан уолаттарга сүбэ биэрэр, кыаҕа тиийэринэн үлэлэһэр хорсун киһи. Кини краповай береттээх саха уолаттарын Арассыыйа краповай береттэригэр ыытан, инструктор буоларга үөрэттэрбит. Бу уолаттар үөһэ ахтыбыт этэрээппит уолаттарын барыларын билиҥҥи сэриигэ анаан бэлэмнээн үөрэппиттэр. Этэрээт уолаттара үгүстэрэ итии точкаҕа сэриилэспит буойуннар.

Алтынньы 1 күнүгэр землячестволар сэбиэттэрэ Кангалассы баар өрөспүүбүлүкэ мобилизацияламмыттары мунньар сиригэр (пункт временного размещения) буойуттарбыт санааларын бөҕөргөтөр тэрээһини өрөспүүбүлүкэ Уопсастыбаннай палаататын кытары ыыттыбыт.

 Улуустар землячестволарыттан харчы хомуйан, Саха Сириттэн буойуттарбыт барар сирдэригэр сэргэ туруордубут, айылҕаттан айдарыылаах алгысчыт Валентин Гаврильевич Исаков алгыс сиэрин оҥордо, аҕабыыт малыыппа аахта, землячество дьахталлара буойуттары алгыстаах алаадьынан күндүлээтилэр, үүттээх итии чэй иһэттилэр.

 Тэрээһиҥҥэ Уопсастыбаннай палаата салайааччыта Н.Д. Бугаев, Ил Түмэн дьокутаата Е.Х. Голомарева, Нам улууһун землячествотын салайааччыта Г.Г. Местников., саллааттар ийэлэрин кэмитиэтин салайааччы Мария Емельянова, Нерюнгри землячествотын бэтэрээнэ В.И. Сорокоумов, улуустар землячестволарын сэбиэтин салайааччы И.Г. Неустроев тыл эттилэр.

 Түмүгэр филармония оркестра Арассыыйа уонна Саха Сирин гимнэрин оонньоото. Тэрээһин бүтүүтэ буойуттар сирэйдиин-харахтыын сырдаабыттарын, санаалара көтөҕүллүбүтүн бэлиэтии көрөн, маннык тэрээһиннэр, кырдьык, наадалаахтар эбит дии санаатым.

Сэргэни мобилизацияламмыттары мунньар сир дьиэтин айаҕар туруордубут. ПВР салайаачыта подполковник Семен буойуттар пуун дьиэтин айаҕар тахсалларын бопто, инньэ гынан нэһиилэ 2 эрэ буойуну көҥүллэтэн таһаардым. Онон буойуттар бары тахсан, айылҕаттан айдарыылаах алгысчыттан дьиҥнээх алгыһы кыайан ылбатылар.

Ол кэнниттэн ПВР көрүдүөрүгэр тэрээһин ыыттыбыт. Онно дьиэ иһигэр уот оттуллубатынан, алгысчыт көннөрү тылынан үтүөнү баҕарда, дьиҥнээх алгыс буолбатах.

Мин санаабар, военкомат, ИдьМ үлэһиттэрэ буойуттар уйулҕаларын туруктара бөҕөх буоларыгар кыһаллыахтаахтар. Онон инникитин маннык тэрээһини уопсастыбаннай, судаарыстыбаннай үлэ тэрилтэлэрэ ыытыахтарын сөп эбит.

Биһиги, улуустар землячестволарын сэбиэтэ, биир да харчыта суох уопсастыбаннай тэрилтэ буолларбыт, дьону көрдөһөн, алгыс тэрээһинин ыыттыбыт. Бу тэрээһиҥҥэ көмөлөспүт Олоҥхо тыйаатырыгар, филармония оркестрыгар, Саха Сирин православнай церковыгар, кыттыыны ылбыт улуустар землячестволарыгар уонна тэрийэн ыыппыт землячество сэбиэтин бырабылыанньатын чилиэттэрэ Н.П. Федороваҕа, С.С. Брызгаловаҕа,  Г.Г. Местниковка махталбын биллэрэбин.

Иван Гаврильевич Неустроев,

Дьокуускай куорат аҕа баһылыгын иһинэн өрөспүүбүлүкэ улуустарын землячестволарын сэбиэтин салайааччыта.