Бастакы тэрээһининэн 1 №-дээх өрөспүүбүлүкэтээҕи балыыһаҕа – М.Е. Николаев аатынан Мэдиссиинэ национальнай киинигэр – СӨ бастакы Бэрэсидьиэнин Михаил Николаев үйэтитэр кабинетын үөрүүлээх аһыллыыта буолла. Тэрээһиҥҥэ өрөспүүбүлүкэ салалтатын бэрэстэбиитэллэрэ, мэдиссиинэ киинин кэлэктиибэ, Михаил Ефимович Николаев кыыһа Ольга Андросова кытыннылар.
Санатан эттэххэ, биир сыл анараа өттүгэр өрөспүүбүлүкэ мэдиссиинэтин уонна доруобуйа харыстабылын киинин сайыннарыыга сүдү киһибит Михаил Ефимович Николаев тирэх буолбут кылаатын бэлиэтээн туран, Ил Дархан Айсен Николаев уурааҕынан Национальнай мэдиссиинэ киинин 1 №-дээх балыыһатыгар СӨ Бастакы Бэрэсидьиэнэ Михаил Николаев аатын иҥэрбитэ. 1993 с. чуолаан кини Ыйааҕынан Мэдиссиинэ национальнай киинэ тэриллибитэ. Ол курдук, бүгүн М.Е. Николаев аатын үйэтитэр кабинет аһылынна.
СӨ Бастакы Бэрэсидьиэнин бибилэтиэкэтин салайааччыта-Николаев-Киин салайааччыта Юрий Семенов бэлиэтииринэн, аан дойдутааҕы суолталаах улахан түгэн мэдиссиинэ тэрилтэтин салайааччыта Станислав Жирков өйөбүлүнэн буолла.
- Манна хас биирдии үлэһит да, ыарыһах да тыыннаах устуоруйаны таарыйан, өрөспүүбүлүкэ Бастакы Бэрэсидьиэнин кабинетын көрүөхтэрин сөп. Анал хоско кини хаартыскалара, суруктара, кинигэлэрэ, тус бэйэтин суруйуулара, туттубут маллара хараллаллар. Бу биһиги Бэрэсидьиэммит саҥа өрөспүүбүлүкэ, доруобуйа харыстабыла, мэдиссиинэ сайдыытыгар сүҥкэн өҥөлөрүн билиниитигэр чаҕылхай туоһутунан буолар. Санатан эттэххэ, кини бастакы Ыйааҕа доруобуйа харыстабылыгар анаммыта. Ол уустук 90-с сылларга кини бары күүһү уурбута, ресурсаны булбута, Саха Сиригэр аан дойдутааҕы таһымнаах Мэдиссиинэ киинэ тутулларыгар дойду салалтатын итэҕэппитэ, - диир Юрий Семенов.
Итини сэргэ Хаҥалас улууһун Өктөм нэһилиэгэр СӨ Бастакы Бэрэсидьиэнэ Михаил Николаев архыып-бибилэтиэкэтигэр – Николаев-Кииҥҥэ – «Доҕордоһуу көрсүһүүтэ» диэн бииргэ үлэлээбит кэллиэгэлэрэ, доҕотторо, судаарыстыбаннай былаас, үөрэх, култуура, доруобуйа харыстабылын, успуорт, уо.д.а. тутаах эйгэлэр бэрэстэбиитэллэрэ кыттыылаах уопсастыбаннас үөрүүлээх мунньаҕа ыытыллар.
СӨ Үөрэҕин уонна билимин министиэристибэтэ үөрэх тэрилтэлэригэр анал кылаас чаастары, «СӨ Инновация күнэ» уруоктары, Саха Сирин аатырбыт уопсастыбаннай диэйэтэллэрэ кыттыылаах «Михаил Николаев – саҥа кэм новатора» диэн лиэксийэлэри тэрийэр. Сотору кэминэн СӨ Бастакы Бэрэсидьиэнэ М.Е. Николаев аатынан «Билиинэн кыайаҕын!» истипиэндьийэни туттарыы үөрүүлээх сиэрэ-туома ыытыллыаҕа. «Саха» НКИХ өрөспүүбүлүкэҕэ Инновация күнүнэн инновационнай сайдыы усулуобуйатын тэрийиигэ бастакы Бэрэсидьиэммит М.Е. Николаев сүдү кылаатын дьүүллэһиигэ анал биэриилэри уонна таһаарыылары көрдөрүөҕэ. Оттон Ил Түмэн иһинэн Ыччат парламена Михаил Николаев аатын үйэтитиигэ «Николаевскай пуорум» тэрийэр.
-
2
-
1
-
0
-
0
-
0
-
0
