25 сыл устата саас ахсын Саха Сиригэр Аҕа күнүн иннинэ ыытыллар үтүө үгэскэ кубулуйбут тэрээһин саамай сымса, күүстээх, тулуурдаах уонна дьулуурдаах аҕалары уолаттарын кытары түмэ тардар. Быйылгы күрэхтэһиигэ Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Нам, Ньурба, Өлүөхүмэ, Өлөөн, Таатта, Уус Алдан, Хаҥалас, Чурапчы улуустарыттан уонна Дьокуускайтан хамаандалар илин кэлин түһүстүлэр.
Ньурба улууһун чиэһин Барабанскайдар көмүскээтилэр. Нэһилиэк аҕа баһылыга Ефрем Михайлович Семенов улуустааҕы Аҕа күрэҕэр Аканаттан Барабанскайдар дьиэ кэргэттэрэ кыайбыттарын кэпсиир: “Нэһилиэкпититтэн бүтэһигин өрөспүүбүлүкэтээҕи Аҕа күрэҕэр 2000 сылларга кыттыбыттара. Икки күн устата тыҥааһыннаах киирсиилэр буоллулар. Санаабытыгар, бастакы кытта кэлбит дьон диэтэххэ, көрдөрүүлэрэ үчүгэй. Саҥатытыы элбэх эбит эрээри, уопутуруохпут, эһиил кыттарга “шанс” баар эбит. Урукку сыллары кытары тэҥнээтэххэ уларыйыы элбэх. Туттар сэп-сэбиргэл үчүгэйин хаартыскалаан, үөрэтэн бэлэмнэниэхпит.
Улууспутугар сүүмэрдиир күрэхтэһиигэ 18 нэһилиэктэн 9 хамаанда киирбитэ. Манна өйүүр бөлөххө Ньурба куорат баһылыга Геннадий Васильевич Игнатьев, улуустааҕы успуорт салаата, Ньурба улууһун, Акана түмсүүлэрэ сылдьабыт”.
Күрэх кыттааччыта Гриша Барабанскай Акана орто оскуолатын 10-с кылааһын үөрэнээччитэ, 16 саастаах. “Аҕабыныын Николайы кытары маннык улахан таһымнаах күрэхтэһиигэ бастакы кыттыыбыт буолар. Улууспутугар кыайыылаах буолан путевка ылан кэлбиппит. Аҕам оскуолаҕа физкултуура учуутала, онон биһигини мэлдьи дьарыктыыр. Мас хайытыыта, саһааннааһын күннээҕи олохпутугар баар буолан эрчиллиилээхпин. Олус долгуйдум. Хамаандалар уопуттаахтар, эрчиллиилээхтэр. Сорох оҕолор төрдүс сылын кыттабыт диэн соһуттулар. Биһиги бастакы кыттыыбыт буолан уопуппут кыра, ортотунан иһэбит”, - диэн кэпсиир.
-
0
-
0
-
0
-
0
-
0
-
0
