Ил Түмэн спикерэ Алексей Еремеев, олохтоох бэйэни салайыныыга сис кэмитиэт бэрэссэдээтэлэ Владимир Прокопьев, тыа сиригэр уонна аграрнай бэлиитикэҕэ сис кэмитиэт бэрэссэдээтэлэ Александр Атласов, оройуон Сэбиэтин бэрэссэдээтэлэ Гаврил Корякин, Чочу нэһилиэгин баһылыга Петр Догоюсов уо.д.а. судаарыстыбаннай, бэлитиичэскэй диэйэтэл, соторутааҕыта Дьокуускайга төрөөбүтэ 100 сыла киэҥник бэлиэтэммит Гавриил Иосифович Чиряев бүүһүгэр саха биир биллэр салайааччытын ахтан-санаан, кэриэстээн тыыннаах сибэкки дьөрбөтүн уурдулар.
Салгыы Ил Түмэн дьокутааттара тыа хаһаайыстыбатыгар сыһыаннаах эбийиэктэри көрдүлэр. Биллэрин курдук, дьокутааттар тыа сирин олоҕо туруктаах буоларыгар, тыа хаһаайыстыбата сайдарыгар сокуоннары ылынан, уларытыылары киллэрэн, бырагыраамалары үбүлээһини бигэргэтэн элбэх үлэни ыыталлар. Ол үлэ быһаччы түмүктэрин Александр Еремеев, Александр Атласов, Владимир Прокопьев Кыадаҥдаҕа урбаанньыт Айталина Томская клубниканы үүннэрэр кыһыҥҥы тэпилииссэтигэр, Мария уонна Владимир Ивановтар көтөр иитэр «Кынат» дьиэ кэргэн хаһаайыстыбаларыгар сылдьан билистилэр, үлэ тэрээһинигэр санаа атастастылар.
Айталина Томская улууска урут ким да ылсыбатах дьыалатын саҕалаан, бастакынан кыһыҥҥы тэпилииссэҕэ элбэх сыллаах бөдөҥ астаах дьэдьэни 2016 сыллаахтан ыла үүннэрэр.
Бастаан Кыадаҥда бааһыналарыгар хортуоппуй, оҕуруот аһын олордуунан дьарыктаммыта. Онтон элбэх сыллаах бөдөҥ астаах дьэдьэн үүннэрээри бөһүөлэк кытыытыгар быраҕыллан турбут аарка гараас каркаһын туһанан, таһыттан поликарбонатынан бүрүйтэрэн, иһиттэн тэпилииссэ бүрүөһүнүнэн тутан оҥорторбута, оҥорсубута.
Айталина Томская кыһыҥҥы тэпилииссэнэн дьарыктанарыгар саҥа саҕалааччы фермер граныгар – син балачча үптээх-харчылаах “Агростартапка” кыайбыта, улуус 900 тыһ. солк. үбүнэн көмөлөспүтэ, эбии 500 тыһ. солк. суумалаах улуустааҕы куонкуруска кыайбыта олук буолбута.
Үтүө саҕалааһыны Чочу нэһилиэгин дьаһалтата, баһылык Петр Догоюсов өйөөн, күүс-көмө буолбут. Быраҕыллыбыт гарааһы урбаанньыкка биэрэн, кини аатыгар көһөрөн, докумуон оҥоруутугар, тутуутугар, коммуникация киириитигэр өйөөбүттэр.
Билиҥҥитэ 2000 ук үүнэр, сайыҥҥы ылыыта 400-500 киилэҕэ тиийэр. 3000 т тиийэ ылыахха сөп. Дьыл кэмиттэн көрөн дьону наймалыыр, үксүн бэйэтэ сылдьар.
Салгыы дьокутааттар сэргэстэһэ турар Иванова Мария Михайловна «Кынат» хаһаайыстыбатыгар көтөрүнэн дьарыктанарыгар анылыгыы тупсаҕай улахан эбийиэгэр тахса сырыттылар.
Икки сыллааҕыта Бүлүү учуутала Мария Иванова дьиэ таһынааҕы хаһаайыстыбатыгар биэс үндүүк уонна 60-ча куурусса, кус, перепелка баар этэ. Бу хаһаайыстыба оччолорго «Агростартап-2021» бырагырааманан грант сүүйбүтэ. Бу пиэрмэ тутуута “Агростартап” бырайыак саҥа саҕалааһыннары өйөөһүнэ үтүө ситиһиилэргэ тиэрдэрин холобура буолар.
Куурусса пиэрмэтэ Чочу нэһилиэгэр киирэр Кыадаҥда бөһүөлэккэ баар.
Инньэ гынан, дьиэ таһынааҕы кыра кэтэх хаһаайыстыбаттан бүгүн улаатан, кэҥээн бройлеры иитэр, чоппуусканы атыыга таһаарар былааннаах пиэрмэ буолла.
Салгыы Алексей Еремеев салайааччылаах Ил Түмэн бөлөҕүн Кыадаҥдаҕа сырыыта Гавриил Иосифович Чиряев түмэлин саҥа киэҥ-куоҥ дьиэтигэр судаарыстыбаннай, бэлитиичэскэй диэйэтэли чугастык билиһиннэрэр көрдөрүүгэ туруоруллубут сэдэх экспонаттары, Саха АССР-ы 17 сыл эҥкилэ суох салайбыт, биир дойдулааҕа — судаарыстыбаннай, бэлитиичэскэй диэйэтэл Степан Аржаков төрүттэспит саха автономиятын чэчирии сайдарыгар анаабыт олоҕун билсиинэн түмүктэннэ.
Манна даҕатан эттэххэ, Чочу нэһилиэгэр уһулуччулаах дьон сыла – Гавриил Чиряев төрөөбүтэ 100 сыла уонна норуодунай суруйааччы Иван Гоголев-Кындыл төрөөбүтэ 95 сыла.
Ил Түмэн пресс-сулууспата
-
0
-
0
-
0
-
0
-
0
-
0
