Үөрүүлээх күҥҥэ Үөдэй нэһилиэгин баһылыга Иван Гаврильев, Нам улууһун үөрэх управлениетын музейын салайааччыта Елена Ивановна Шарапова, Нам 1 нүөмэрдээх оскуолатын музейын салайааччыта Яна Егоровна Корякина, оскуола үөрэнээччилэрэ, анал байыаннай дьайыы кыттыылаахтарын дьиэ кэргэттэрэ кыттыыны ыллылар.
Быыстапка хас да бөлөххө арахсан Улуу Кыайыы 80 сылыгар ананан турда. Ол курдук, “Мин дьиэ кэргэним уоттаах сэрии сылларыгар”, “Учуутал буойун, салайааччы үрдүк аатыгар сүгүрүйэн”, “Буорах сыттаах суруктар”, “Кыайыыны уһансыбыт биир дойдулаахтарбыт”, “Кыайыы сыла Үөдэйгэ” уонна анал байыаннай дьайыы кыттыылаахтарыгар анаммыт “Сырдык ааккыт үйэлэргэ сүппэтин”, “Эр киһи анала – төрөөбүт дойдуну көмүскээһин” истиэндэлэр, ону тэҥэ быстах байыаннай хомуурга түбэһэн ытык иэһин толоро сылдьар Степан Софронов — Үс түүн уолун хоһоонугар истиэндэ дьон болҕомтотун тарта.
Аалай кыһыл лиэнтэни нэһилиэк баһылыга Иван Васильевич уонна анал байыаннай дьайыыга сырдык тыынын толук уурбут Иван Яковлев төрөппүттэрэ Валентина Эдуардовна, Иван Дмитриевич Яковлевтар кырыйан быыстапканы арыйдылар.
Биир дойдулаахпыт Татьяна Дмитриевна Колесова уонна кини кэргэнэ өр сыл салайар үлэҕэ үлэлээбит, көҥүл тустууга ССРС спордун маастара Савва Васильевич Колесов ытык-мааны ыалдьыттарынан буоллулар уонна олохтоох оскуола түмэлигэр, кинилэр дьиэ кэргэттэрэ аҕа дойду сэриитин сылларыгар уонна анал байыаннай дьайыы кэмигэр диэн ис хоһоонноох “Утум ситимэ” альбом кинигэни туттардылар.
Кинилэр төрөппүт уоллара, сиэннэрэ уонна чугас аймах уолаттар дойду чиэһин көмүскүү, эйэлээх олох туһугар анал байыаннай дьайыыга кыттыыны ылаллар.
Алексей Дмитриевич Яковлев нэһилиэккэ эрэ буолбакка, бүтүн республикаҕа үйэлээх үлэни хаалларар, элбэх историческай матырыйааллары түмэн, кэлэр көлүөнэ ыччакка өлбөт-сүппэт үйэлээх баай ис хоһоонноох, иитэр-үөрэтэр суолталаах быыстапканы туруорбутун кэлбит дьон үгүс махтал тылларын тиэрдэн, уйадыйан ыллылар.
Алексей Яковлев Үөдэйтэн төрүттээх анал байыаннай дьайыыга сырдык тыыннарын толук уурбут эр хоһуун уолаттарбыт Олег Кумечко, Иван Яковлев, Иван Черноградскай сырдык кэриэстэригэр альбом оҥорон чугас дьонноругар бэлэх уунна.
Маны тэҥинэн, байыаннай дьайыыга кытта сылдьар Степан Софронов хоһооннорун түмэн “Окуопаҕа олорон” диэн ааттаах брошюра бэчээттэтэн төрөппүттэригэр Анна уонна Устин Софроновтарга туттарда.
Оҕону-ыччаты билиҥҥи кэмҥэ патриотическай өйгө-санааҕа уонна аныгы кэм ирдэбилинэн, олох баран иһэр сайдыытынан ааспыт, билиҥҥи, кэлэр кэми кытта ситимнээх буолууга сүдү болҕомтону ууран туран, оскуола түмэлин дьиэтигэр сыл устата музейнай уруоктар ыытыллыахтара диэн Алексей Дмитриевич иһитиннэрдэ.
Екатерина Эверстова, Үөдэй
-
0
-
0
-
0
-
0
-
0
-
0
