Ханнык да циркэ дьиэтигэр атыллаан киириэхпиттэн, оҕо саас алыптаах кэмигэр тиийбиттии сананабын. Бу да сырыыга оннук буолла. Араас дьэрэкээн көстүүмнээх артыыстар үөрэ-көтө көрсөн, олорор сиргин чопчу ыйан-кэрдэн биэрдилэр.
Буолуохтаах кэмигэр, үһүс звонок кэннэ, манеж иһигэр ытыс-таһынар хараҥа... Эмискэ, уот сандаара тыкта, остуоруйа алыптаах дойдутугар баар буола түстүбүт. Уот-күөс чаҕылыйан олорор, маныаха Санкт Петербургтан хас эмитэ туонна анал аппаратураны аҕалбыттар эбит.
Көрөөччүлэр бииртэн биир тахсар артыыһы дохсун ытыс тыаһанан көрсөбүт. Эчи, таҥастара дьэрэкээнэ, кэрэтэ. Акробаттар сиртэн тэйэ чэпчэкитик ойуолаан киирэллэр, араас хатыламмат трюктары көрдөрөллөр. Онтон салгын гимнастара кыл түгэнэ биирдэ көрбүтүн купол анныгар тохтоло суох эргичийэ сылдьаллар! Төгүрүкчээн хулахуптардаах кыыс отой даҕаны манеж ортотугар туран эрэ бэрт элбэҕи эргиттэ, көрөргө олус да умсугутуулаах.
Аартыка шпиц ыттарын оҕолор өрө чаҕаара, дохсун ытыстарын тыаһынан көрүстүлэр. Кылбаа-маҥан көпсөркөй түүллэх истигэн ыттар бэрт чэпчэкитик ойуокалаһан, салайааччыларын хамаандатын чопчу истэн, бэртээхэй нүөмэрдэри бэлэхтээтилэр.
Аара дьоһумсуйа туттар попугайдары сэҥээрдибит, астынныбыт. Дьэрэкээн өҥнөөх, олус өйдөөх, кырата суох көтөрдөр манеж иһигэр көтөн киирбиттэригэр, бары даҕаны саҥа аллайдыбыт. Аны арыаллыыр артыыстар таҥастара-саптара, тутталлара-хапталлара, попугайдар киһи буолан сылдьалларын санатарга дылылар.
Шоу иккис аҥаарыгар кэтэһиилээх “Big cat sһow” саҕаланна. Номнуо манеһы эргиччи хайыылаах үрдүк боробулуоха күрүөнү тардыбыттар. Көрөөччүлэри миэстэлэриттэн турбаттарыгар, хаартыскаҕа сандаардан түһэрбэттэригэр көрдөстүлэр: “Сыанаҕа адьырҕа кыыллар үлэлиилэр”, - диэн сэрэттилэр. Дьэ, ол кэннэ, тигрдар, африка хахайа уонна туус маҥан филиппин тигра кутталлаах эрээри, олус интэриэһинэй нүөмэрдэри көрдөрдүлэр. Тугу гыммыттарын киһи тылынан кэпсиирэ ситэтэ суох буолуо, онон күндү ааҕааччы, баран көрдөххүнэ эрэ толору билиэҥ, астыныаҥ, дуоһуйуоҥ.
Икки аҥаар чаас устата барбыт шоуну биир тыынынан көрдүбүт. Кыра даҕаны оҕолор күүскэ сылайбакка, ытыстарын харыстаабакка таһынныллар, күөмэй олоруор диэри хаһыытастылар. Көрөөччүлэри кытары циркэ бэһиэлэй клоуна бэртээхэйдик оонньосто, күллэрдэ, дьээбэлэстэ.
Дьэ, онон күндү ааҕааччыбыт, бэртээхэй шоуну көтүтүмэ диэн ыҥырабын.
Билиэттэри циркэ moretticircus.ru. официальнай саайтыттан атыылаһыахха сөп.
Маны сэргэ, чэпчэтиилээх билиэттэри атыылаһарга, эбэтэр кэллэктиибинэн сайаапкалары түһэрэргэ циркэ хаассатыгар тиийиэххитин сөп. Хаасса өрөбүлэ уонна тохтобула суох сарсыарда 10.00 чаастан киэһэ 19.00 чааска диэри үлэлиир. Билсэр нүөмэргит: 88002341754 (звонок босхо).
Цииркэҕэ сылдьыҥ, сэргээҥ, дуоһуйа сынньаныҥ!
Галина МАТВЕЕВА
Ааптар хаартыскаҕа түһэриилэрэ.
-
2
-
0
-
0
-
0
-
0
-
0
