Дойду көмүскэлигэр сылдьар биир дойдулаахтарбытыгар көмө тохтоло суох барарын туһугар улууспут дьаһалтатын өйөбүлүнэн массыыналары «Ситим» муниципальнай автономнай тэрилтэ эбийиэктэригэр туруордулар диэн "Эркээйи" суруйар.
Алексей Егоров, «Кыайыы туһугар – бииргэ!» суһал ыстаап бэрэстэбиитэлэ:
– Мэҥэ Хаҥалас дьаһалтатын көмөтүнэн «Ситим» тэрилтэ гараастарыгар улуустартан кэлбит тиэхиньикэни көһөрөн аҕаллыбыт. Билигин манна 11 массыына баар уонна өссө да кэлэ турар. Бу иһигэр матассыыкыллар уонна баһыылкалар бааллар. Салгыы бу тиэхиньикэни улахан уйуктаах массыыналарга тиэйэн ыытабыт. Сорох баһыылкалар, массыыналар тустаах дьоҥҥо аадырыстаахтар.
Саха сирин дьоно-сэргэтэ, тэрилтэлэрэ кыайыы туһугар күннэтэ бэйэлэрин кылааттарын киллэрэллэригэр, күүс-көмө буолалларыгар махталбын тиэрдэбин, – диэн эттэ.
Петр Лебедев, Амма улууһун бэрэстэбиитэлэ:
– Римма Васильевна Алексеева салайааччылаах «Амарах сүрэх» Амматааҕы уопсастыбаннай тэрилтэ көмөтүнэн уонна Соморсун нэһилиэгин дьаһалтатыттан 155 №-дээх дивизияҕа итиэннэ 143 №-дээх полкаҕа икки УАЗ массыына баран эрэр. Манна көмөлөспүт дьон элбэх. Маны сэргэ саллааттарга анал баһыылкалар бааллар.
Амма олохтоохторо күн айыы түмсэн биир дойдулаахтарыгар көмөлөһө олороллор. Олунньу ыйга «Амарах сүрэхтэр» 2,5 туонна гуманитарнай көмөлөөх баран кэлбиттэрэ.
Түгэнэн туһанан, Аммам дьонугар-сэргэтигэр махтаныахпын баҕарабын. Мэлдьи маннык түмсүүлээх, уолаттарбыт туһугар бары биир санаанан салайтараммыт, күүс-көмө буолуоҕуҥ, – диэн иһитиннэрдэ.
Сонун төрдө уонна хаартыска: "Эркээйи", Иван Лукин
-
0
-
0
-
0
-
0
-
0
-
0
